E participacion di Isaï Labadie den e concurso di Mr. Universe International 2025 sin duda algun tabata un gran logro di cual e ta cosechando su frutonan. Actualmente e tin 80.1K followers riba Instagram, cu ta demostra su popularidad y dicon el a gana Social Media durante e concurso. Recientemente e tabata invita pa forma parti di e panel di hurado na e certamen di Miss Universe Curaçao 2026. Su impresion for di momento cu Bianty Gomperts a subi esenario tabata cu e no tabatin competencia y ta un excelente candidata.
Sinta den e panel di hurado pa Miss Universe Curaçao 2026, Isaï Labadie a experiencia un certamen interesante, unda constantemente tabatin yen di detaye pa evalua di cada un di e candidatanan. Un ora y mey prome cu e certamen a cuminsa tabatin un reunion cu tur shete hurado y nan a wordo instrui ki tipo di candidata e organisacion internacional ta busca. Asina pa ora di haci nan votacion tabata sa precies riba kico husga e candidatanan.
Locual a impresiona Isaï mas con Curaçao ta organisa certamen di beyesa ta e apoyo 100% di e gobierno y tambe bon sponsor, 50 mil florin na premio mas un auto. For di su punto di bista ta cu na Aruba e hendenan no tin amor pa certamen di beyesa y ta duna mas prioridad na cosnan robes. Ta keha pa tur cos y kier duna premio cheap, y ora un representante bay mal representa tur hende ta keha, pero ningun hende ta aporta.
Como Mr. Universe Caribbean el a biaha varios bes cu tur gasto paga pa e organisacion manera pasashi, hotel, cuminda y zakgeld pa haci labornan social. Isaï ta comparti den Focus Digital Magazine di e luna aki tocante su experiencia durante su biahenan. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
