“PASCO ATARDI” NA HIT 94 FM CU E TOKE NETAMENTE ARUBANO

Nos lo bay conecta cu e tempo di antes a traves di HIT 94 FM cu e programa “Pasco Atardi” presenta pa Maria Fawcett Caster. Lo rebiba e Pasco di antes contando di nos tradicion- y custumbernan, acompaña pa musica cu ta e alma y curason di e programa. E tema- y historianan cu ta presenta den e programa ta basa di experencia di e añanan cu Maria a presenta programa di Pasco. Como un hende muhe Arubiano cu a lanta den e cultura netamente local, e ta biba e temporada di Fin di Aña celebrando cu famia den alegria compartiendo tur locual nos grandinan a laga atras como herencia cultural.

E mama di Maria tabata su empuhe, pilar y sosten tempo el a presenta e programa di Pasco añanan atras. Despues di un temporada di profundo tristesa cu fayecimento di su kerida mama y di su unico yui homber, Ferdinand, cu a fayece tragicamente 7aña pasa, awor e ta sinti cu e ta cla pa bay pa e reto aki. E programa ta den aire durante dos luna riba dialuna, diarason y diabierna for 3’or pa 6’or di atardi, cuminsando dia 23 october proximo. Tanto Maria Fawcett Caster como HIT 94 tin añanan sin presenta programa di Pasco, pues esaki lo ta bay ta un desafio pa ambos.

Maria como e presentando di “Pasco Atardi” ta bisa: “Un goso total cu nos oyentenan di Hit 94 FM. Conecta cu e tempo di antes, recordando nos gruponan di aguinaldo y disfrutando di e gaitanan di awendia. Entrevista cu nos artistanan cu ta prepara cu hopi amor canticanan nobo pa nos por disfruta den e temporada di Pasco. Recetanan excelente, facil y dushi pa e temporada aki. Nos lo presenta entre otro e receta di nos drikidek y boyo di maishi rabo di antes. Y ken por lubida e shot di Cucuy”.

 

Un cordial invitacion ta bay na e comunidad di Aruba pa sintonisa “Pasco Atardi” cu ta debuta diabierna 23 di october pa 3or di atardi na HIT 94 FM. Den Focus Digital Magazine di e luna aki, Maria Fawcett Caster ta comparti mas informacion di e programa, cu lo bay deleita e oyentenan cu e toke netamente Arubano. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)