Crisleidy ta bin di un famia yen di estilista, unda a crea My Favorite Beauty Destination, cual e persona principal ta su mama Cristina Castillo. Crisleidy tin 21 aña y ta bayendo Colegio EPI sector Welzijn Niveau 3 y su pasatempo preferi ta wak ‘tutorials’ y drag race show. Ta un makeup artist ta un forma di inspiracion, diberticion y libertad di expresion, cu a bira su pasion y ta dedica su tempo liber, despues di scol, como su trabou.
Momento cu Crisleidy a descubri cu makeup por resalta e beyesa di un persona, el a dicidi di tuma les cu un makeup artist di Argentina, dia tras dia pa 8 luna largo. Den e lesnan el a siña con pa deal cu diferente tipo di piel, con pa combina diferente color, teoria di ‘brushes’, siña conoce diferente tipo di marca pa makeup, teoria di cada tipo di makeup, desde makeup di dia pa makeup di anochi, pa ultimo e biaha pa asina haci su MasterClass y haya su di 3 diploma personalmente. E estudio pa profundisa mas den e arte di makiyahe, a lag’e sintimas sigur y cu mas gana di haci, loke mas e ta gusta.
Desde hopi chikito bo tabatin e curiosidad pa explora cu make-up? Asina mes! Cu mi a nace y crece den e mundo di beyesa tabatin influencia, sinembargo ta poco tempo pasa, mi a haya sa cu makeup ta mi pasion.
Cu ki edad y momento bo a dicidi cu lo bo ta desea pa specialisa como make-up artist?
Mi tabatin 19 aña, ora mi a descubri cu mi pasion tabata makeup.
Con bo ta defini bo estilo como make-up artist?
Mi ta considera mi mes un makiyista hopi curioso y tribi, pasobra semper mi kier haci trends nobo.
MI LO KIER SIÑA MAKEUP DRAG QUEENS
Makiyahe pa ki ocasion bo ta gusta mas pa haci?
Mi gusta tur, specialmente makeup pa fiesta.
Si bo tin 5 minuut pa makeup con bo por logra un bon resultado toch?
Mi lo concentra den ‘skin preparation’ y resalta e lipnan, eyebrows y contour pa asina mi logra un makeup facil.
Si bo tin cu makiya un celebridad ken esaki lo ta?
Mi lo gusta makeup RuPaul, pasobra mi lo kier siña makeup Drag Queens.
Ki ta bo meta?
Mi meta ta pa caba scol y na mesun tempo, bira un makeup artist reconoci na Aruba.
