E obhetivo di e evento aki ta pa duna homenahe na e hende muhernan actual, cu a demostra nan capacidad di por anda den diferente tarea di nan bida. E tareanan manera: profesional den nan respectivo trabou y den e parti personal como mama y esposa, ademas di nan cuido personal cu hopi disciplina.  Muhernan cu lo ta portavoz di nan experiencia atraves di nan presencia magnifico riba escenario, maneho di nan curpa y nan mensahe cu ta wordo respalda pa un video di nan bida real.

E inspiracion pa duna e homenahe aki na e Hende Muhernan Ehemplar ta Carlos Centeno, cu ta un artista Venezolano cu ta residencia na Aruba for di aña 1990. Carlos ademas di ta un Licenciado den Arte di Universidad Central de Venezuela, ta fundador di Coreobicos de Venezuela, cu ta un ekipo di competencia y exhibicion Aerobico Deportivo na nivel Olimpico. Carlos su inicio na Aruba tabata como embahador cultural den Festival Internacional de Danzas Contemporanea na Aruba unda 24 pais a participa. Na aña 1996 el a representa Venezuela na Convencion Internacional Aerobics Funk.

Entre e hende muhernan cu ta haya homenahe tin: Flor Lacle (Propietario y ehecutivo di Real Estate) –  Misha Wever (Culturista di fitness cu a gana varios premio den diferente competencia y ta un taxista independiente) – Janella Gómez (Bachelor den Business Administration Economics and finance, cu specialisacion den banco, ta tambe Master in Business Administration and Finance, cu specialisacion den inversion y accounting )  – Merelitsa Croes (Cu a traha hopi aña exitosamente den ekipo di timeshare y awor ta feliz pa traha como waitress na Aeropuerto Internacional Reina Beatrix) –  Ellen Kuster (Cu ta abogado y ta forma di e conocido bufete di Abogado Kuster) y como invitado internacional; Betty Adkins, (Campeon Internacional di Bodybuilding, figura reconoci  den competencianan di Ms Olympia USA). Cu e invitado special aki, Betty Adkins, lo realisa un combersacion entre e hende muhernan ehemplar riba escenario.  E audiencia presente tambe ta haya e oportunidad pa participa cu nan preguntanan na e hende muhernan local y e invitado internacional durante e evento. Esaki ta tuma lugar diabierna 7 di februari na Teatro Cage Night Club pa 8:00 pm. E produccion ta den man di Humphrey Odor, cu ta un personahe hopi conoci pa su experticio den espectaculonan impactante. Manera ta di spera cu lo tin sorpresa unico e anochi aki, unda e publico lo keda impresiona cu locual e organisadornan tin prepara pa e prome edicion di ‘E Muhernan Exemplar’ di Aruba. E prijs pa ticket ta unicamente AWG 25.00 y ta obtenibel na Cage y tambe por yama 561 0032.

LEAVE A REPLY

Please enter your comment!
Please enter your name here