E coleccion mas special te cu awor pa e diseñadora, Rekha Croes-Daryanani, ta esnan cu e ta traha cu e palabranan inspirativo na Papiamento. Esaki ta trece hopi mas cerca di cas, pero pa un otro persona cu no ta compronde Papiamento, ta un misterio kico tin skirbi. E coleccion nobo cu Rexa Bizou a lansa, ‘Papiamento’, ta consisti di e cadenanan traha cu e palabranan di afirmacion na Papiamento, cu un diseño diferente. Na inicio di e marca 6 aña pasa, e prome coleccion tabata consisti di e acesorionan di cabuya y cuero. Awor ta uzando e materialnan manera stainlesss steel, sterling silver y e cristal- y piedranan natural.
Loke ta haci e coleccion ‘Papiamento’ esun mas special pa Rekha ta cu Papiamento ta un idioma unico. Tin ora nos no ta para keto na esaki, pero ta solamente 3 isla chikito ta papia e idioma aki cual ta mas of menos 341,300 persona cu por papia y compronde Papiamento. Rekha ta bisa: “Nos ta e uniconan na henter mundo cu sa con pa comunica den e idioma aki. Ora mi traha un acesorio na Papiamento, e ta trece hopi mas cerca di cas pa nos, pero pa un otro persona cu no ta compronde Papiamento, e ta un misterio kico tin skirbi. Y esey ta haci mi acesorionan na Papiamento special y unico”.
Lesa e entrevista cu Rekha Croes-Daryanani den edicion di FOCUS Digital di maart cu ta acesibel via Apple Store of Android Google Play Store, cu por download e aplicacion aki gratis riba un smartphone of tablet.
