Shandeeh Arends tabata riba portada di FOCUS na mei 2011 cu manera tur aña e enfoke ta riba e rol di e mama en conexion cu e celebracion di ‘Mother’s Day’. E tempo ey su yiu homber Rocco Maximus tabatin 4 aña y el a elabora den su entrevista tocante su rol como mama moderno y su responsalibidad como un muher profesional. Despues di casi 11 aña Shandeeh ta hopi ‘excited’ y tin tur cos cla pa warda e momento yega pa ricibi su segundo yiu, cu ta un BABY GIRL.
Riba social media por a mira diferente potret cu su amiganan a post di e ‘baby shower’cu nan a organisa pa Shandeeh. Ya e tabata sa cu lo bay tin un ‘baby shower’ segun cu el a conta FOCUS News Flash. Su amiga Sonaly a anticip’e tocante e idea, pero el a pensa cu esaki lo tuma luga mas despues. E sorpresa pa Shandeeh tabata grandi momento cu el a drenta e luga unda supuestamente el a bay pa breakfast cu su tata y su ruman, pa topa eynan cu su amiganan.
E baby ta ‘uitgeteld’ pa nace riba e mesun fecha, 4 di april, cu Rocco ta hasi aña. Tocante e nomber di su yiu muher, Shandeeh lo bay anuncia te ora e nace, pero si el a conta un tiki con a yega na e nomber. E prome nomber a wordo scogi door di Rocco, djis cu Shandeeh y su amiga a cambia e manera con ta scirbi’e. E di dos nomber cu tin un nificacion grandi pa loke e baby ta bay trece cerca nan, y tabata un idea di dje y un bes mas su amiga.
Shandeeh ta bay haya su baby cu 40 aña y ta kere cu su bida lo bay cambia ful atrobe, ya cu un baby ta tuma hopi tempo y atencion. Mas despues e lo sigui cu su rutina manera bay gym. Riba e pregunta si tin algo cu e lo desea di haci diferente compara cu su prome yiu, Shandeeh a contesta:”Diferente mi no lo hasie, mi ta super contento con tur cos a bay cu Rocco. Loke si lo ta diferente awo ta, cu mi tin Rocco cu ta hopi atento durante mi embaraso y sigur cla pa yuda mi despues cu su ruman cu tanto e tabata desea”.
