Autentico Aruba Culinary Festival a surpasa tur expectativa, creando un experiencia inolvidabel pa tur cu a asisti. Un evento cu a reuni un mescla perfecto di ambiente, musica y sabor, caminda cu a disfruta di un coleccion varia di cuminda eleva y diverso, cada uno presentando e miho di arte culinario di Aruba.
A percura pa crea un espacio cu a permiti pa relaha y gosa di e hospitalidad renombra di nos isla den un ambiente trankilo y ideal pa famia. E exito di e festival ta mustra e amor creciente pa e escena culinario di Aruba, creando un demanda grandi pa ripiti e evento na 2025.
Diasabra 12 di october, e miho mixologistanan di Aruba a subi riba escenario na e di seis edicion di e Bartenders’ Brawl den colaboracion cu #WheninAruba. Un evento cu a conta cu ocho mixologista talentoso selecciona pa distribuidornan di bebida local, cu a competi pa crea e miho cocktail di e isla. Cada uno tabatin ocho minuut pa prepara tres bebida pa e huradonan, cu a inclui Master Bartender Kate Gerwin, Mixologo Abraham Urdaneta y Jessika Theysen, un sommelier renombra y gerente di e restaurant Ritz Carlton.
E competencia aki a pone enfasis riba creatividad, presentacion y sabor, cu actuacion sobresaliente di Nelson Molina cu a conkista e prome luga cu su bebida ‘Nos Cultura’, Carlos Perez cu a tuma di dos luga cu ‘Coconut Cascade’, y Luisa Rivero cu a tuma di tres luga cu su bebida basa riba tequila ‘Jalea Real’. Otro participante tabata David Posada cu su bebida ‘Temponan di Antes’, Esneider Tuñon cu ‘Aruba Heritage’, Yokasta Felix cu ‘Exotic Paradise’, Giovanni Tromp cu ‘Cucumber Rose’, y Orlando Navas cu ‘Turista Sunrise’. E bartendernan aki no solamente a demostra nan habilidad tecnico, pero tambe a presenta e diversidad di bebida tanto local como internacional, subrayando asina e escena eleva di bebida na Aruba.
Riba diadomingo, 13 di october 2024, a tuma luga e competencia emocionante di Iron Chef Aruba. Un evento prestigioso cu tambe tabata den colaboracion cu #WheninAruba. Tres chef talentoso a mustra nan habilidad, arte y creatividad culinario segun un ‘3-course menu’ pa asina logra conkista titulo di Iron Chef Aruba 2024. E huradonan pa e competencia di Iron Chef tabata den persona di Alvaro Clavijo – Chef y doño di El Chato na Bogota cu ta number 25 riba e lista di The World’s Fifty Best Restaurants pa 2024 y number 4 na Latino America, sigui pa Anotia Lofaso – Chef restaurado, conoci pa su aparencia di programa Top Chef y Cutthroat Kitchen, y autor di The Busy Mom’s Cookbook. E siguiente hurado tabata Olivier Falchi kende ta Executive Chef di Hilton Aruba desde 2020, y por ultimo Aldwin Donata cu ta Executive Chef na Holiday In Resort Aruba cu un historia den sciencia cu ta percura pa ehecucion di arte culinario unico. Ta di menciona cu durante di e competencia, cada chef tabata asisti pa studiantenan ganador di e Student Competition di studiantenan di E.P.I. y EPB, cu a tuma luga na comienso di september 2024, den anticipacion di e evento ‘Autentico’.
Ronella Croes, CEO di A.T.A., a anuncia e titulo maximo di Iron Chef Aruba 2024 cu a keda den persona di Moises Ramirez, Sous Chef na Lima Bistro, cu a impresiona e huradonan cu su platonan innovador. Como premio, Moises ta ricibi un NYC Culinary Exploration trip pa dos persona, cu ta inclui pasashi aereo ida y buelta, 4 anochi di estadia na hotel, y 5 experiencia culinario na New York pa dos persona.
Di dos luga a keda den persona di Jeanclaude Werleman, Chef de Cuisine na Infini Aruba cu a gana un recorido educativo den Cattle Country, organisa pa Certified Angus Beef & US Meat Export Federation. E premio ta inclui pasashi aereo ida y buelta, estadia na hotel, cuminda, y e recorido educativo na un rancho di baca, y e oportunidad pa conecta cu chef y expertonan den e industria culinario.
Na di tres luga a keda den nomber di Juan Ludeña, Executive Chef na Bistro L’Avenue & Papillon Restaurant cu a gana un bishita na Certified Angus Beef International Round-up na Wooster, Ohio. E premio ta inclui pasashi aereo ida y buelta, estadia, cuminda, recorido na un criadero, y un experiencia di “Carcass Breakdown and Ideation”, y e oportunidad pa conecta cu chef y expertonan den e industria.
E studiantenan di EPB y E.P.I. cu a asisti e chefnan tabata Annie Ortega, Kahlil Mullers, Jayden Heyden, Phelan Tromp, y e studiantenan ganador di e anochi tabata Michael Padron y Dylan Cardona. Tanto school EPB y E.P.I ta ricibi dos set di buki Modernist Cuisine: The Art & Science of Cooking with Stainless Steel como donacion.
Un evento exitoso cu ta sigui strategia segun modelo di High Value-Low Impact di A.T.A., creando eventonan di calidad halto cu impacto abou, poniendo e comunidad local tambe central, caminda cu huespednan riba e isla tambe por a uni y comparti cu nan. Pero e evento tambe ta “showcase” e area historico, cultural y culinario di Oranjestad! Y mas cu claro e ta un oportunidad unico pa nos talentonan local y pa nos negoshinan den area di F&B, sin lubida e trayecto di brinda educacion na nos studiantenan cu tambe ta un aspecto importante tras di ‘Autentico’.
A.T.A. y e ekipo di Autentico Aruba Culinary Festival ta manda un palabra di gratitud na tur compania pa e pasenshi y colaboracion, boluntarionan, ekipo interno y externo cu a contribui na e exito di Autentico Aruba Culinary Festival 2024.
