Dia di Mama hopi biaha ta invita nos pa celebra cariño, cuido y amor incondicional. Pero pa hopi hende muhe, e dia aki ta trece algo mas keto… algo cu casi no ta wordo papia. No tur ser femenino a ricibi e experiencia di calor di un mama di berdad. Calor di un mama no ta simplemente tin un mama presente. E ta e experiencia di wordo mira, brasa, nutri y ricibi tanto e parti emocional como fisico.
E ta e sensacion profundo den bo curpa, cu bo por laga bay… y semper tin un hende cu ta sostene bo. Ora e experiencia aki no t’ey e curpa ta adapta. Hopi hende muhe ta bira fuerte, independiente y capaz. Nan ta siña cuida nan mes y tur hende rond di nan. Di pafo nan ta mustra poderoso… y si nan tin poder pero bou di e forsa, hopi biaha tin un curpa cu nunca a siña completamente con pa relaha den sosten ricibi.
Y aki intimidad ta wordo afecta. Paso intimidad di berdad no ta trata di “performance”. E ta trata di permiti bo mes wordo sinti, sostene y ricibi. Si bo curpa nunca a conoce “safe nurturing”, ricibi por sinti hopi straño… hasta incomodo. Con bo por nota esaki? Den Focus Digital Magazine di mei, Dina Alexander ta contesta e pregunta aki cu varios ehempel. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
