E sintimento tabata mas cu solamente e celebracion di bautismo di Ariëlla, pero uno di bida y futuro cu nan ta creando e momento cu Andruw Kelly a baha na rudia pa pidi Charlain Boekhoudt pa casa cu ne. Locual a haci nan compromiso inolvidabel tabata con bunita, personal y emocional e tabata rondona pa nan sernan keri. Siguiendo creando momento special, Andruw y Charlain a sorpresa nan invitadonan cu un otro anuncio inespera durante nan celebracion matrimonial. E yegada di nan segundo yiu y na mesun momento a haci e gender reveal unda a bira conoci cu e famia ta wordo bendiciona cu un baby boy.
Como pareha nan meta ta pa crea un hogar amoroso, stabil y cu respet. Pa lanta nan yiunan den un ambiente sigur y di sosten. Un hogar unda nan ta sinti nan mes balora, sigur di nan mes y liber pa prospera. Awor nan famia ta completo cu nan prinses y nan prins na caminda. P’esey pensando bek riba e dia di nan matrimonio “10.04.2026” ademas di bisa “SI” pa semper na otro, e momento mas emocional ta pa haya sa cu nan ta sperando un “baby boy”. E inspiracion pa e tema di nan matrimonio tabata precisamento escogi pa comparti e momento special aki di nan bida.
Charlain y Andruw nan celebracion matrimonial tabatin tur e detayenan cu nan a desea, cu tokenan significante y hopi emocional pa honra nan sernan keri cu no t’ey mas y pa nan por a forma parti di e celebracion. E escogencia pa e bendicion na Kapel di Alto Vista tin un nificacion hopi special pa ambos y cu e ta representa: “E Comienso”. Awendia oficialmente Sr. y Sra. Kelly ta describi nan matrimonio como magico, romantico y rondona di amor.
Den Focus Digital Magazine di juni, Charlain y Andruw ta comparti kico a haci e fecha di nan matrimonio mas cu un celebracion y tambe nan momentonan mas special a traves di bunita potretnan. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
