Museo di Kòrsou ta habri dia 20 di augustus, “Rumbo i Raís”, e exposicion solo nobo di e artista multidisciplinario Curasoleño David Paulus. “Rumbo i Raís” ta sali for di un pregunta fundamental: no solamente unda nos ta bay, sino tambe for di unda nos a bini. “Rumbo i Rais” ta existi band’i otro. Nos pasado, nos memoria y loke generacionnan prome cu nos a laga atras ta sigui forma e manera cu nos ta move dilanti.
Den mas cu shen obra di arte, Paulus ta reuni portretnan, memoria, expresion, material y historia cu ta conecta diferente generacion y diferente parti di sociedad Curasoleño. Artista, escritor, educador, cargado di cultura, politico, activista, musico, deportista, trahado social y miembronan di su propio famia ta forma parti di e universo visual di e exposicion.
Casi tur obra tin un palabra, dicho of expresion liga na dje. Tin cu Paulus a tende den su propio famia, otro ta bini for di memoria cultural di Corsou y tambe for di Aruba. Materialnan cu anteriormente tabatin un otro funcion ta bida y nificacion nobo den su practica artistico. Asina, memoria no ta presenta como algo cu a keda intacto, sino como algo cu ta sigui cambia, move y haya forma nobo.
Un parti di e personanan retrata no ta na bida mas. Sinembargo, e exposicion no ta indica ora nan a fayece. Esaki ta un escogencia consciente. “Rumbo i Raís” no ta pone un frontera entre esnan cu ta aki y esnan cu a bay dilanti di nos. E ta refleha un creencia cu hopi Curasoleño ta comparti: cu nos antepasadonan ta sigui presente, ta compaña nos y ta forma parti di ken nos ta.
E mesun ideanan ta presente den e proceso creativo di Paulus. Ora e ta crea, e no ta considera su mes como un artista cu ta traha su so. E ta crea den compania di su antepasadonan. Den su obra, pasado y presente ta biba den e mesun espacio.
David Paulus ta un artista multidisciplinario Curasoleño cu ta biba y traha na Doetinchem, Hulanda. Su practica artistico ta profundamente hancra den su raisnan Curasoleño y den experencia di diaspora. Historia di famia, ritual, identidad, antepasadonan y memoria colectivo ta sigui forma un parti importante di su trabou. Recientemente, Gobierno di Corsou a honr’e pa e manera cu e ta duna visibilidad na cultura y identidad Curasoleño den exterior.
