Miss Youth Aruba 2017, Shanty Kanhai, ta biahando diaranson 28 di Augustus pa 10’or di mainta pa Guayaquil, ECUADOR caminda e certamen di Miss Teen Earth ta tuma luga.
Esaki ta di 7 edicion di e certamen unda nan lo scoge e mucha muhe cu tin humildad, simpatia, inteligencia y cu un cara bunita pa carga e corona maximo. Shanty ta un hoben dedica y determina pa logra loke e kier den bida, banda di ta un persona hopi trankil, humilde y cu un beyesa natural. Ademas di tur e cualidadnan aki, e ta hopi bon prepara den tur aspecto tanto mental- como físicamente pa competi den e certamen.
Shanty Kanhai ta di 2 representante di Aruba na Miss Teen Earth despues di 6 aña cu Karol Croes a participa y conkista e titulo di Miss Teen Fire. Shanty su preparacion a cuminsa for di 2017 cu tur locual ta exigi pa ta bon prepara pa competi den un certamen internacional. E programa cu Miss Teen Aruba Foundation a prepara pa Shanty tabata inclui; lesnan di pasarela, oratorio, public speaking y gym. El a bay hopi seminario di e.o.; Ecología y ‘go green’ cual ta loke e certamen ta basa riba dje. E team di Shanty ta hopi chikito, cuminsando cu su mayornan Ana y Prekash cu semper ta support Shanty den tur loke e gusta haci. Robin, Susan, Edson, Daniel, Jesus, Aaron y Suhaila ta poco di e personanan cu a duna un granito di ayudo pa su preparacion.
E presidente di Miss Teen Aruba Foundation, Robin Croes, a comparti e siguiente cu FOCUS: “E trahe di gala di Shanty ta keda un sorpresa unda despues Aruba lo wak e espectaculo di trahe di gala cu Shanty a uza. Su trahe nacional a wordo diseña pa Carlos Tromp, basa riba e energia solar y tambe ‘green everywhere’ cual ta e slogan oficial di Miss Teen Earth. Su vestuario lo ta uno amplio, di jumpsuits, rompers te na cocktails y gala. E diseñonan ta di Shanty mes y di su Team”. Shanty lo ser acompaña pa su mayornan; Ana y Prekash, Robin Croes (director nacional), Susan Kelly y Edgar Kock cu lo ta su hair & makeup artist na Ecuador.
Prome cu tur cos mi kier bisa cu Focus ta un bunita y bon revista. Semper mi ta lesa boso revista. E biaha aki mi ta hanja e content di e articulo aki no correcto. Pa ta un Miss cu ta un digno representante di Aruba bo mester tin hopi mas cu un cara bunita y mayornan cu kier complasebo den tur bo deseonan. Un mucha mujer asina mester tin un bunita curason y inteligencia di berdad, no djis skirbi den un articulo manera ta e caso aki. E persona aki no a sa di demostra riba su mes cu e ta persona cu boso ta describi aki, humilde y determina di un manera sincero. Alcontrario na diferente ocasionan na skol e la bully otro mucha muhernan y mimes pa nos apariencia. E nunca no a partisipa di su propio boluntad cu algo pa juda un otro. Ta e certamen a pone esaki como condicion. Tampoco e no a demostra su inteligencia pasobra e no ta interesa den su propio estudio. Alcontrario. E mucha mujer aki no ta un bunita ehempel pa otro teenagers cu si ta traha pa bai dilanti di berdad. No ta bon pa Focus duna e impresion na otro teenagers cu esaki ta un bon role model. Ami ta kere cu Focus semper a sa di apoya hende mujernan cu di berdad ta traha pa hasi un cambio positivo. Esaki ta mas un propaganda pa algo cu no ta cuadra at all cu berdad.