Rotaract Club of Aruba ta presenta: YOU Inc. Seminar 2018

Rotaract Club of Aruba ta presenta pa di 4 aña consecutivo, YOU Inc. Seminar 2018. E meta di YOU Inc. Seminar ta alinea cu Rotaract Club of Aruba su meta pa promove desaroyo profesional y personal di e comunidad di Aruba. E participantenan na e seminario aki lo ricibi “tips and tricks” valioso pa uza como herment den nan profesion y bida personal.

Abo ta fada di lesa e triunfo(nan) di otro hende? Abo a yeg’i puntra bo mes: “Dicon ami no por ta exitoso manera otro hende?”, “Dicon mi no a trece cambio den mundo of mi comunidad ainda?”. Si bo a yega di puntra bo mes e preguntanan aki, YOU Inc. Seminar 2018 ta pa bo! Bo futuro ta cuminsa awor!

E topiconan cu a selecta e aña aki ta basa riba e retonan cu ta wak den e arena profesional riba nos isla. Door di e evaluacion aki a yega na e desicion di busca oradornan cu por elabora extensivamente riba e temanan aki, cu nan trayectoria y experiencia. E aña aki e tema di e seminario ta “Live Your Best Life!”, “Biba bo mihor Bida!”. Cu esaki ta desea di inspira tur individuo pa ta e miho version di nan mes y biba “mindful”.

E topiconan cu lo trese dilanti ta: “work-life balance”, “personal branding” y “Leadership & Navigating Your Career”.

“Work-life balance”, ta un reto awendia pa hopi persona den e area laboral. E expertonan lo siña e participantenan na e seminario con por traha conscientemente pa haya e balansa aki den nan bida. E otro topico “personal branding”, lo siña cu nos tur ta un “brand” riba nos mes, y tambe lo siña con pa pone bo mes den e miho luz, pa asina bo representacion exterior refleha bo cualidadnan cu bo ta para p’e, y kier wordo relaciona cu ne.

E ‘keynote speech’ di “work-life balance” y “personal branding” lo wordo duna door di James Michael Lafferty, e speaker internacional invita pa e seminario aki. E tin experiencia como CEO di diferente compania grandi manera Coca Cola, Procter & Gamble, BAT y awor CEO di Fine Hygienic Holding na Dubai. James a traha pa Procter & Gamble pa 24 aña, unda el a crece den e compania y a bira e prome General Manager pa Procter & Gamble su Near East Business. James tambe tin e pensamento pa yuda e comunidad y ta para tras di diferente causa comunitario rond mundo y den su carera.

E di tres topico cu lo wordo discuti ta: “Leadership & Navigating Your Career”. Leadership ta hopi importante pa enfoca riba dje den tur persona y nivel den un organisacion. Ronella Tjin Asjoe-Croes, CEO di Aruba Tourism Authority N.V., cu ta un ‘trailblazer’ den su ramo, lo elabora riba e topico aki. Ronella Tjin Asjoe-Croes a ricibi diferente reconocimento manera; “Woman of the Year 2014” y “Caribbean Tourism Director of the Year 2015 ”. El a funciona den diferente Board y Comision na Boneiro y Aruba, incluyendo comision nacional socio-economico, proteccion natural y cultural. Ronella a forma parti tambe den e “Aruba Junior Chamber”.

YOU Inc. Seminar 2018 lo tuma lugar dia 2 di juni den Alhambra Ballroom for di 9or di mainta pa 2or di merdia. Rotaract Club of Aruba ta encurasha pa inverti den bo mes, y bin amplia bo conocemento y tin un diasabra diferente cu usual, cu lo agrega balor na bo desaroyo.