E weganan cu Hilyann y su tata Hildward Croes (q.e.p.d) tabata hunga tempo e tabata chikito y con hopi nan tabata hari te pega aden di con loco nan tabata, ta entre e bunita recuerdonan cu e ta comparti cu FOCUS den su revista di juni.
E portada di Hilyann y Hildward Croes na juni 2014, segun Hilyann tabata uno hopi emocional, pero tambe profundo. Un tata y un yiu a ilustra esaki, reflehando ternura, amor y comprension total pa otro den tur aspecto di bida. Hildward a tipifica Hilyann como un angelita den su bida y un persona cu e por a comparti tur loke ta biba den mas profundo di su curason.
Hilyann ta corda con tempo cu e tabatin cuater aña mas o menos, su tata tabata gusta haci manera cu e ta presentando un programa y e mester haci un entrevista cu ne. E tabata pon’e haci pregunta, cu un skeiro di cabey den man, fungiendo como microfon, y e tabata contesta mescos cu e ta haciendo un entrevista importante.
“Mi ta kere cu si e por a mira mi awor, e lo hari den su mes na e ironia di con e wega, cu mas nos tabata gusta hunga antes, a bira mi trabou y parti di mi bida.”
Hilyann ta corda cu e tempo cu nan a pasa cu otro tabata loke mas cu el a gusta durante e photo shooting. “Inesperadamente, e tabata hopi receptivo. Normalmente, pa loke ta trata portada, mi tata tabata tin e tendencia di ta basta reserva, pero el a hay’e un idea leuk y tabata entusiasma.”
Busca bo revista pa luna di juni awe mes y disfruta di un contenido varia e interesante!
