Cu e vision fresco y nobo, dunando contenido na e titulonan mas importante pa nos isla, a corona diahuebs anochi den Alhambra Ballroom cuater Miss cu ta bay representa Aruba den certamennan internacional. E titulo cu nan a ricibi ta a base di e resultado di e puntonan segun e criteria pa cada certamen cu nan a ser husga durante 1 siman largo.
E beyesanan cu a ricibi nan corona y sjerp pa e certamen cu nan lo bay representa Aruba:
Kimberly Julsing – Miss Aruba Universe
Nurienne Helder – Miss World Aruba
Raquelle Reeberg – Miss Aruba Hispanoamerica
Hannah Arends – Miss Aruba Internacional del Café
E director di Miss Aruba, Endy Croes, a informa na FOCUS cu despues e lo bay duna mas detaye aunke e no kier divulga mucho di e strategia cu nan ta bay uza. Nos por compronde cu esaki ta pa evita cu otro paisnan bay aplica e mesun armanan den e mundo di beyesa cu nan lo bay uza.
Desde un principio Endy Croes a bisa cu su deseo ta pa e titulo di Miss Aruba haya e prestigio y balor cu e merece. Nan ta bay traha duro pa nos Miss Aruba ta un rolemodel pa mucha-, hoben- y adultonan local y internacional. Pabien na Kimberly, Nurienne, Raquelle y Hannah y exito den nan preparacionnan. Un pabien na Endy Croes y Star Promotion Foundation hunto cu e team cu a duna nan respaldo pa logra realisa e certamen.
