DUBAI WINE GALA TA E TEMA DI E EVENTO ANUAL DI KIWANIS CLUB OF ARUBA

Kiwanis Club of Aruba a anuncia e tema di nan famoso evento anual di recaudacion di fondo. E aña aki e tema ta “DUBAI WINE GALA” cu lo transporta nos imaginacion na e sofisticacion, elegancia y spendor di Dubai.

Sin nos bay bek na e temanan di e ultimo cuater añanan; Fire & Ice, Oxigen, Casino Royale y Great Gastby, aworaki cu Dubai por spera atrobe un decoracion super espectacular den Renaissance Convention Center. E experiencia cu Kiwanis Club of Aruba ta crea den e esfera di su tema di wine gala,ta locual ta duna su evento e toke unico di glamour, elegancia y sofisticacion na Aruba.

Sigur nos por cataloga e ‘wine gala’ di Kiwanis Club of Aruba como un top evento unda cu tur e personanan cu cumpra un ticket, cu ademas di contribui pa un bon causa, ta bay experiencia un anochi fabuloso. E escogencia di e parti tanto di entretenimento como cuminda, bebida y si agrega e doorprize, sigur cada ticket di AWG 400 pa dos persona ta bal su prijs. E aña aki riba escenario diasabra 29 di september ta e popular bandanan; N’Fusion, Buleria, Blue Boulevard hunto cu DJ Edson Tromp. E “wine stations” asina gusta cu e seleccion di e miho biñanan di e diferente casnan, sigur e aña aki atrobe lo ta hopi bishita, mescos cu e “stations” cu variacion di keeshi y un buffet pa deleita tur hende cu exkisito arte culinario Arabe.

Carchi ta na benta cerca tur miembro di Kiwanis Club di Aruba of via 567-8567. Por reserva carchi via Kiwanis Club of Aruba su Face Book page of via e website www.kiwanisclubofaruba.org. E dress code ta gala y e tema ta crea e oportunidad pa bisti cu e tokenan elegante, pa acentua e anochi di ‘Dubai’. Lo tin varios ‘door prize’ atractivo unda e main door prize lo ta un travel voucher di biahe balora na AWG 2500 caminda e ganador por scoge e destinancion di su gusto. Tur e fondonan cu recauda durante “Dubai Wine Gala” ta destina pa cubri e diferente proyectonan cu Kiwanis Club of Aruba ta ehecuta na beneficio di nos comunidad.