LOLITA TABATA UN PERSONAHE CONTROVERSIAL Y COLORIDO

Recientemente a tuma luga e desvelo di e estatua di “Lolita”, cu ta un proyecto cu a inicia bou di e Ministerio encarga cu Cultura y Turismo den gobernacion anterior. E gobierno actual conhuntamente den e Conseho di Minister a aproba e continuacion di e proyecto di “Lolita”. E artista cu a crea e obra di arte ta Gilbert Senchi, cu a tuma alrededor di 1 aña pa realisa e tremendo obra aki.

E storia di “Lolita” ta e storia di hopi hende muher di San Nicolaas di decendiente afro caribense, cu despues di nan lucha pa emancipacion di sclavitud den e islanan cercano, a dicidi di bin Aruba durante e bonanza petrolero pa asina cuminsa un bida nobo.  E damanan fuerte y independiente aki a traha duro pa lanta nan famia y yuda desaroya economia di San Nicolaas.  Nan a crea e base di nos sociedad actual.  ”Lolita” ta un nomber hopi reconoci na San Nicolaas cu nan tabata yama, Sra. Cremony, controversial y colorido personahe popular di Village, cu tabata produci su mesun productonan y bende nan durante actividadnan rond Aruba.  E spirito di entrepreneur, e storia di superacion y e legado familiar di hopi di e damanan aki incluyendo Sra. Cremony ta base di inspiracion di e obra aki.