Un elenco di artistanan local ta actualmente filmando e pelicula “Huicio Perfecto” cu ta un pelicula produci pa Angel Productions, cu Angelo Croes como director principal, Roy Croes como co-director y Stephanie Croes como assistant director den script y screenplay.
Segun tin planea cu e premiere di e pelicula lo tuma lugar despues di Carnaval otro aña.
E director, Angelo Croes, a haya inspiracion pa alerta e comunidad Arubiano pa nan bira consciente di e crimennan organisa cu a cuminsa infiltra pocopoco den nos nacion. E elenco tin alrededor di 8 luna preparando pa e pelicula y tur diasabra nan ta train e escenanan durante 3 pa 4 ora. E prome filmacion tabata den sala di corte cual a bay perfectamente sin niun problema. Te cu awor nan a filma 20 escena, cu a bay hopi bon mes danki na tur e training cu nan a logra completa prome cu dia di filmacion. Tin cuater personahe den “Huicio Perfecto” cu tin un rol masha peculiar mes; Django, Max Harms, Cachora y Narianna. Django ta e personahe principal cual rol ta ser hunga pa Alvin Molina, y e otro actornan ta Manuel da Silva como Max, Daybelis Croes como Cachora, y Joy de Nobrega como Narianna
Sigur tabatin hopi reto pa por a realisa e pelicula local aki y especialmente den e parti financiero. Nan a haya alrededor di un miyon florin den loke ta encera ayudo den localidad-, auto-, sponsor- y personanan cu a para firme tras di e proyecto aki. Nan sponsornan ta; KFC, RDA, DOIT Center, Island’s Best Windows and Doors, Clinica Dr. John Croes, Sultan Restaurant, Caribbean Bar y tambe Manuel da Silva. E vestuario, makiyahe y transportacion di e personahenan a ser cubri pa cada actor nan mes. E ekipo ta hopi contento y agradeci na tur esnan cu a aporta di algun manera of otro pa asina nan por a logra realisa e proyecto artistico local aki.
