Un di e personanan mas feliz cu e resultado di Miss Youth Aruba 2018 ta sin duda e guru nobo den e mundo di beyesa, Roberto Avalo, di The Salon Aruba. Cu e coronacion di Shariënne Winterdaal diasabra ultimo, awor nan team tin tres corona logra pa loke ta aña 2018. E prome cos cu Roberto ta haci semper ta gradici Dios, cu ta su fortaleza di mas grandi .
Desde e diahuebs dia 29 maart 2018 cu Roberto a conoce e mucha muher espectacular aki, Shariënne Winterdaal, cu ademas ta espontaneo, sweet y cu un personalidad impactante, el a sinti cu e lo conkista e corona di Miss Youth 2018. For di e dia ey, el a visualisa e triunfo di Shariënne cu e titulo maximo cu el a gana diasabra ultimo. Despues di 4 luna largo di trabou y hopi amor, cu e resultado aki el a sa di demostra cu bo no mester paga e luz di niun hende pa bo por shine.
E mesun Master Team cu a prepara Marsheline Kock (Aruba’s Carnival Queen 2018), Anaïza Marquez (Miss Teen Aruba International 2018), a forma parti di e triunfo di Shariënne Winterdaal. Roberto cu hopi orguyo ta bisa: “Nan a sa di demostra cu nan ta beyesa cu inteligencia. The Salon Aruba y tur e miembronan di nos Beauty Team a sa di haci Shariënne un reina tambe”. E preparacion a tuma basicamente alrededor di 4 luna, for di maart tempo cu nan a cuminsa cu e preparacion exitoso di Shari, manera cariñosamente Roberto ta yame.
E formula cu nunca ta faya segun Robero Avalo ta Dios su poder, y cu cada proyecto cu bo ta cuminsa mester tin su seyo, sin Dje nada di esaki por ta posibel. E otro banda di esaki ta; conoce, confía den bo mes y loke bo ta capaz. “Corda cu exito sin vision ta simplemente suerte”, segun e estilista. “Pa cada biaha cu bo ta faya bo mester purba mil biaha mas, pasobra den e derotanan tambe tin recompensa, good days ta duna bo happiness, pero bad days ta duna bo experience. Esey ta net loke a hiba mi logra crea The Salon Aruba y tambe e tres coronanan aki”.
Cada proyecto a duna Roberto e inspiracion pa cuminsa cu e siguiente, y asina nan a bay den un one way pa e aña exitoso aki!
