E mundo di beyesa tabata den gran expectativa pa e anuncio oficial di e organisacion di Miss Universo encabesa pa Sra. Paula Shugart. Den un rueda di prensa a anuncia cu e pais cede pa cu e certamen Miss Universo 2018 lo ta Thailand. Pa e fanaticada Asiatico esaki tabata un alegria inmenso debi cu nan ta e fanaticada di mas grandi ora ta trata apoyo. Ultimo biaha cu Thailand tabata cede di Miss Universo tabata na 2005 unda cu Aruba a wordo representa pa Louisana Cicilia. Expectativanan ta halto e aña aki, cada pais ta den preparacion completo pa locual ta trata na representante. Aruba lo wordo representa pa Kimberly Julsing, un hoben cu tin experencia caba den mundo di beyesa. Den pasado Kimberly a sali 2nd Runner-up Miss Teen Aruba International, 2nd Runner-up Reina di Carnaval 63. Organisacion di Miss Aruba encabesa pa Hendrik Croes ta den preparacion pa Aruba sobresali un biaha na Miss Universo. Aña pasa Aruba tabata constantemente den lus di media cu representacion di Alina Mansur. Aruba a bin ta crece bao e fanaticada Asiatico pues no lo tin duda cu nan lo sostene nos representante na Thailand. E certamen di mas halto y importante den e mundo di beyesa lo tuma lugar dia 16 di December pa 7PM den un transmision bibo riba FoxTV.
