For di Raquelle su inscripcion na Miss Aruba, por a nota su disciplina pa cu su participacion. Raquelle no ta desconoci riba pasarela di modelahe y por domina esaki facilmente. Actualmente Raquelle ta den preparacion intensivo pa e certamen di Reina Hispanoamericana cu lo tuma lugar na Bolivia den luna di November. Ainda nos por corda Digene Zimmerman cu su look exotico (cabey cortico) cu a conkista e titulo di 1st Runner Up, un certamen importante pa e region di Caribe y Latino-Americano. E preparacion fisico di Raquelle ta den man di Rene Wild, su pasarela y public speaking den man di Endy Croes, mientras cu e parti di etiket, actitud y protocol ta den man di Anoutcka Koolman-Burleson. Raquelle a deposita su confiansa den Endy Croes pa locual ta trata su vestuarionan y su shimis di gala pa e anochi final. No tin duda cu Raquelle lo ta hibando un coleccion espectacular encarga pa Endy. Recientemente Raquelle a realisa su photoshoot oficial pa e certamen di Reina Hispanoamericana caminda cu a try out diferente look. Por a presencia Raquelle den un look cu cabey straight, ‘pageagent curls’ como tambe su ‘wild curls’. E look exotico di Raquelle lo bay capta atencion y ya caba nos por mira su presencia riba rednan social den e mundo di beyesa. Raquelle ta biahando 21 di Oktober y e certamen final lo ta 3 di November. Nos kier a desea Raquelle tur clase di exito.
