Cu inmenso alegria Sharissa de Roo y Edgardo Wever awe mainta a carga nan baby girl pa prome biaha. E nomber di nan prinses cu nan no kier a divulga prome, awe a bira conoci. E precioso baby su nomber ta “Alina Hayley Idamia Wever”. Cada un di e nombernan aki tin un nificacion sentimental y special nan tras.

Sharissa ta felis cu su baby cu a nace manera cu el a imagina; saludabel y precioso, cu desde su yegada ta yena di amor y atencion. Alina a nace awe mainta 7:19 y el a pisa 3870 gram y su largura ta 51cm. E partera cu a yuda cu e parto ta Stephanie Daal di Amare Midwife Practice. Den un entrevista den revista FOCUS di e luna aki, Sharissa a enfatisa cu como mayornan caba nan semper a percura di duna nan yiunan e atencion y guia cu nan tin mester y pa e yiu cu a caba di nace awe no lo ta diferente. Sin embargo e lo ta un experiencia nobo pa nan como pareha pa tin un yiu hunto y cuminsa ful di nobo cu tur e fasenan inolvidabel cu ta bay tin cu ne. Alina Hayley Idamia ta fruta di e amor, cu ta uni Sharissa y Edgardo.

LEAVE A REPLY

Please enter your comment!
Please enter your name here