SHANTY KANHAI CORONA COMO MISS TEEN EARTH 2018 NA ECUADOR

Ayera nochi dilanti un publico grandi e beyesa representando Aruba, Shanty Kanhai, a ser corona como Miss Earth 2018. E impacto di Aruba na e certamen tabata asina grandi cu indudablemente e merece di gana e corona maximo. Durante henter dia ayera Shanty tabatin diferente actividad y su desfile den e parada di trahe nacional a ricibi un tremendo acogida di e mirones, cu casi no tabata lag’e cana of baila pa por saca potret hunto cu ne. E certamen den un parke na e Ciudad de Milagro a finalisa casi 1’or y mey di madruga y awe tardi Shanty ta yega Aruba cu e vuelo di Avianca for di Bogota.

Awe mainta FOCUS tabatin contacto cu e director di Aruba, Robin Croes, cu a comenta cu un bos yen di satisfaccion y emocion cu e ta un logro grandi di wak e trabou y empeño a wordo premia. Tanto Shanty como su mayornan y e organisacion a traha duro pa e logro aki y manera cu Robin a bisa: “hard work pays off”! E ta un logro grandi pa su organisacion cu ya tin dos corona internacional y nan lo bay pa mas den futuro. A pesar cu nan ta sin drumi nan ta hopi contento cu nan ta regresa Aruba cu e corona di Miss Teen Earth 2018.

E apoyo di e publico den e parke, cu nan a converti den un mini Poliedro, tabata den su mayoria pa Aruba, Brasil y Ecuador mes cu ta e pais cu a host e certamen. Na final ora cu Aruba a gana, a bira imposibel pa su acompañantenan di Aruba por a saca un potret cu ne debi na e avalancha di fanaticada cu tabata kier a saca potret cu Shanty. E shimis cu Shanty a luci ayera nochi ta un diseño di Alejandro Fajardo di Venezuela y su trahe nacional ta un creacion di Carlos Tromp. Awor cu e titulo di Miss Teen Earth, Shanty Kanhai, tin diferente compromiso pa bay cumpli cu ne y tambe a ricibi diferente premio entre cual un trip pa Galapagos Islands.