Christopher Geerman a bay Merca 6 aña pasa pa haci di su pasion su carera profesional den e arte culinario. Na e scol ta unda el a topa den klas cu Ashley Hayes, cu tambe tabata eynan pa mesun rason cu ne. Arte Culinario ta dos palabra cu hunto ta envolve loke ta realmente unico y bunita, mescos por describi tambe e amor di Chris cu ta chef & Ashley cu ta pastry chef.
E miho momento cu Chris a scoge ‘pop up’ e pregunta tabata na Disney World pa e celebracion di nan 6 aniversario di noviazgo. El a desea pa ‘surprise’ Ashley y puntre pa casa cu ne. E fecha pa e dia special den nan bida a bira 31 di augustus y durante un bunita ceremonia na beach, Chris & Ashley a ricibi e bendicion pa nan union matrimonial. E tabata un momento hopi bunita pa Chris ora e tabata mira Ashley ‘walk down the aisle’ bisti na blanco. Ademas di mira su famia y su friends despues di casi 3 aña pa ta hunto cu nan riba un dia asina special
Entre e invitadonan tabata presente un di e primanan popular di Chris, esta ex-Miss Aruba, Tracey Nicolaas, cu ta den dushi espera. Tracey tin 5 luna na estado y su pareha, Omar Steve Lejuez, ta bira tata pa segundo biaha. Awor un dama hoben y elegante, Jovȇlle Castro, yiu muher di Poentje, cu a acompaña su mama Valery na e fiesta. E fashionista y influencer, Candy Rasmijn, manera semper ta luci espectacular tabata acompaña pa e beyesa, Katyuska Hessing, cu ta pareha di su yiu homber.
E mama di e bruidegom, Maria Geerman-Esguerra, tabata un excelente anfitriona y mas importante, un mama orguyoso y felis hunto cu su casa Dino Geerman. E celebracion di e matrimonio di Christopher & Ashley tabata esplendido y cu tur e detayenan special pa hacie un dia inolvidabel. E plan cu e pareha tin ta pa realisa hunto e creacion di un concepto unico den nan ramo di arte culinario y despues pa sigui expande esaki. Pabien y Exito na Christopher & Ashley Geerman.
