E tabata un di e galanan di Hollywood cu a marca e decadanan di 70 y 80, cu su actuacion den peliculanan manera “The Longest Yard” y “Deliverance”. Despues di añanan di gloria Burt Reynolds a bolbe briya na final di ’90 cu e film “Boogie Nights”, cu a dune su prome y unico nominacion na e premio Oscar.
E actor di “The Smokey and The Bandit” a fayece awe mainta na edad di 82 aña di un atake di curason na Jupiter Medical na Florida. Reynolds tabata lucha cu problemanan di salud e ultimo añanan y e tabata uza un baston ora e pose pa potret. E ta culpa su mobilidad limita na e stunts cu e mes tabata haci den transcurso di su carera. Burt Reynolds a nace na Michigan dia 11 di februari 1936, pero el a crece na Florida despues cu su tata a haya un trabou eynan. E tabata hunga futbol na Florida State University, prome cu su speransa di bira un futbolista profesional a finalisa debi na lesionnan cu el a sufri den un accidente di auto.
El a muda pa New York na 1950 en busca di un carera como actor, haciendo diferente rol di menos importancia na television te ora el a haci su debut riba big screen na 1961. Reynolds a casa cu e actriz Judy Carne na 1963, pero a divorcia dos aña despues. E tabatin un fling durante 5 aña cu Sally Field, cual a finalisa na 1982. El a casa cu Loni Anderson na 1988 y nan a adopta un yiu homber, Quinton, prome cu nan a divorcia na 1993. Nancy Lee Hess, un sobrina di Burt Reynolds, a bisa cu su omo no tabata djis un ‘movie icon’, e ta un homber generoso, pasiona y sensitivo cu tabata dedica na su famia, amigo y fans.
