Edicion di FOCUS pa e luna di september su tema ta “Romance y Amor” ilustrando parehanan cu nan bunita storia y nan celebracion matrimonial. E parehanan cu ta den e revista di e luna aki cu nan boda ta; Marlon & Zuleyma, Rick & Darlene, Jean Pierre & Audrienne, Aad-Jan & Zachary y Jason & Nicole. Nan ta conta desde nan prome ‘date’, con a ‘pop up’ e pregunta, detayenan di casamento y nan honeymoon.

E pareha riba portada Marlon Petrocchi & Zuleyma Laclé a compromete na Colombia na december 2011 y na 2017 nan a dicidi di cuminsa planea e casamento. E fecha di 26 di juli 2018, cu nan a scoge pa casa ta paso cu e dia ey nan a haci 10 aña hunto. Rick Engelbrecht & Darlene Falconi, a conoce otro den zomer di 2014 na un café durante un night out cu varios amigo. Tabata 1 aña pasa (18 juli) dia di nan aniversario durante un romantic dinner setting cu Rick a pop up the question. Nan a cuminsa prepara asina cu nan a compromete, cual ta 1 aña precies. Jean Pierre Faro & Audrienne Krozendijk, a conoce otro na trabou den luna di december di 2014. Nan a tuma e decision di casa despues di 2 aña hunto. Jean Pierre a ‘pop’ e pregunta, ora cu nan a caba di haya nan baby na 2016 y nan a tuma 1 aña y mey pa nan casa. Jan de Gruijl & Zachary Croes, Reina Infantil 1998, a conoce otro dia 2 di maart di 2013 via un amiga, na Keizerstraat na Scheveningen. Como cu ambos tabata encanta documentario e tempo ey, nan prome date tabata na Zachary su cas, unda cu nan a busca algun bon documentario pa wak hunto. Jason Croes & Nicole Nicolaas, conoce otro henter nan bida, ya cu nan mayornan tabatin amistad for di ora cu nan tabata chikito. Nan prome date tabata na Rotterdam, unda nan a bay come cuminda Thailandes. Despues cada un a bay su cas, pero a planta un simia di amor.

Ademas di comparti e bunita storia di amor cu ta unico segun e caracteristica di e protagonistanan, ta mustra tambe e momentonan mas emocionante a traves di e fabuloso cobertura fotografico den FOCUS… Busca bo revista!

LEAVE A REPLY

Please enter your comment!
Please enter your name here