Endy Croes tabata un di e huradonan pa e certamen di Miss Curaçao 2018 cu a tuma luga diasabra ulltimo. E ta un tarea cu e ta tuma semper hopi na serio y alabes ta purba tambe pa siña mas. Mayoria di biaha ora di un certamen e ta backstage y no ta mira loke hurado y/of publico ta mira. Awo el a haya e oportunidad pa mira y analisa mas. E tarea riba su mes tabata duro, pasobra tabatin 6 candidata cu cada un tin algo otro cu nan ta fuerte aden, pero mester keda enfoca riba cua di nan lo resalta internacionalmente. Internacionalmente Endy a yega di para hurado na Miss Teen Bonaire na dos ocasion y awo Miss Curaçao tambe. Na Aruba mes e no sa para hurado hopi, pasobra casi tur ora e tin candidata ta yuda of prepara completo.
E impresion di Endy di e organisacion Curaçao Beauty Pageant ta, cu aunke e sa cu ta prome biaha cu nan ta organisa e certamen, e ta mira e gana y entusiasmo cu nan tin pa organisa e certamen mas importante di Curaçao. Bisando esey tambe e mester agrega cu tin algun punto cu por cana miho structura, pero e ta sigur cu nan a siña masha hopi di nan prome salida. Endy ta sigui bisa: “Ora bo ta organisa un certamen pa prome biaha e cantidad di persona cu ta cla pa critica ta grandi y mi ta admira cu nan a pusha door di esey pa logra organisa e certamen. E trabou di e organisacion no ta cla despues di e certamen, awo e trabou mas pisa ta bay cuminsa, esta di prepara e candidatanan pa cosecha exito ora cu nan bay e certamennan internacional
Segun e experticio di Endy cu e ganadora Akisha Albert ta un candidata hopi sigur di su mes y aunke e tin hopi experiencia, el a percura pa sigui prepara y educa su mes riba diferente aspecto. Como preparador di reina el a reconoce e trikinan “secreto” cu ta wordo uza den certamen y Akisha ta domina nan hopi bon. Den su presentacion e por a mira cu e sa kico su meta ta y ta traha pa logr’e, no ta zomaar e ta subi un stage sin prepara. Esey ta di admira y ta bisa hopi di su determinacion pa cosecha exito. Bo por imagina Akisha riba escenario internacional ta modela y tambe papia cu confiansa dilanti un publico.
Nos Miss Aruba Universe 2018, Kimberly Julsing, tabata hunto cu Endy Croes na eleccion di Miss Curaçao y sin cu e kier, el a causa impacto pa su beyesa y estatura impresionante. Endy canando cu Kimberly den airport sin sjerp y sin corona, e ta ripara cu bista di esnan rond ta bay riba dje. Na Curaçao prensa y tambe esunnan cu sa di mundo di beyesa a keda hopi impresiona cu su beyesa y spontanidad. Nan a opta pa Kimberly bisti un shimis simpel, pero di color impactante cu a cay na agrado di hopi hende. Banda di atende e certamen di Miss Curacao, Kimberly a probecha pa bishita un cas di anciano pa mira con e cuido pa nos grandinan ta na Curaçao, mirando cu Kimberly mes ta un studiante di enfermeria cu un pasion pa traha cu hende grandi. Aki Kimberly a demostra su afinidad pa traha cu hendenan di edad y el pasa un mainta masha ameno combersando cu esunnan cu ta keda na e cas di anciano.
