Diadomingo 25 di november venidero, Rotaract Club ta contento y orguyoso di por presenta un otro edicion di e programa anual tan stima di ‘Pasa Pret cu Rotaract.’ E evento ta bay tuma lugar na Club Caiquetio na Paradera entre 1’or pa 5’or di atardi y entrada y tur wega of actividad ta completamente gratis. Esaki ta e di cinco edicion di Pasa Pret cu Rotaract cual ta un feria gratis yena cu wega y actividadnan dibertido pa mucha di tur edad. Sint & Piet tambe lo t’ey presente pa 1’or di merdia pues ta conseha pa tur hende yega trempan pa por disfruta di esaki tambe lo tin un Bouncy House, Grupo di Baile, Musica di DJs y artistanan invita Zyon, Wichi y Ty pa muchanan por disfruta.
Pasa Pret cu Rotaract ta wordo organisa den conexion cu e dia Internacional di e Proclamacion di e Derechonan di Mucha di Nacionan Uni. E evento aki ta uno gratis habri pa tur hende, un oportunidad special pa tur mucha por hunga y experiencia algo diferente riba nan dia. Lo tin un variedad di actividadnan dibertido pa e muchanan y Rotaract Club of Aruba lo anuncia cada un di e actividadnan aki e dianan nos dilanti riba nan rednan social. Algun di e actividadnan ya caba menciona ta e Careda di Bulamento den Saco, Careda di Douw, Mik y Tira, Bowling, Huki di Arte, Face painting, Photobooth, Careda cu Cuchara y mucho mas cu lo tini pa asina e muchanan por hunga activamente. Na final di tur e weganan, tur mucha ta haya e oportunidad pa busca un regalo den e grabbelton. Bar y cushina lo ta bon surti na prijs di famia y tambe lo tin e stand di Pofferdorie presente bendiendo hopi cos dushi di come y refresca.
Aña pasa e evento tabata sigur uno exitoso cu a trece hopi felicidad den tur mucha cu a participa, kende realmente a haya un oportunidad pa hari hopi y pasa pret cu otro. Nos ta spera di wak boso un bes mas e aña aki pa locual sigur lo bay bira un otro dia dibertido cu hopi wega, premio y experiencianan memorabel pa nos muchanan. Nos kier a gradici nos sponsors Aeropuerto Internacional Reina Beatrix Aruba Airport Authority N.V., El Louvre Witec – Everfresh Juices, Stichting Passaat y nos colaboradornan Mi Mami, D&D y Elite Productions.
Pa mas informacion, Like y Follow e pagina di Facebook y Instagram di Rotaract Club of Aruba of klik cu bo ta interesa riba e pagina di e evento Pasa Pret cu Rotaract riba Facebook.
