Ruben Trapenberg y su morto repentino
Considera kisas como Aruba su miho presentador di noticia, e conocido personalidad Ruben Trapenberg a sorprende tur hende cu su morto repentino e aña aki. Sigur si tene na cuenta, cu su malesa tabata mustra venci. Despues di a keda confronta cu e noticia di su malesa fin di aña pasa, el a bandona e mundo musical, farandula y noticioso y busca su salud na Hulanda na comienso di e aña aki. Algun luna despues el a bolbe Aruba cu un animo halto y salud stabiel. Apenas el reanuda su labornan, cu Ruben a bin fayece den su soño den un fin di siman. Su morto a sorprende tur hende, sigur despues di e pensamento cu e lo a vence su malesa algun tempo prome. Su carisma di semper, a pone cu su siguidornan tabata enorme y e avalancha di hende cu a compañ’e na su entiero tabata testimonio di esey.
Aeropuerto di Aruba a gradici su partnernan valioso pa 2017
Aruba Airport Authority N.V. (AAA) recientemente a tene su Relations Party anual y a usa e oportunidad aki pa gradici tur su partnernan cu ta traha hunto pa aerouerto por ta exitoso. E evento cu tema “Glow” a wordo teni den e Ballroom di Aruba Marriott, y durante e celebracion a duna 3 reconocimento di parti di AAA pa e prestacionnan excepcional den 2017: Copa Airlines, KLM y Soutwest Airlines pa nan ‘On-Time-Performance”. De Wit & Van Dorp – Souvenirs & Toys tambe a ricibi un “Concession Award” .
Ruben Garcia y un cambio den estilo di bida
Ruben Garcia, director di e emisora Power FM y conocido locutor y presentador, a regresa Aruba despues di un periodo den exterior, pa motibo di su salud, despues di a sufri un atake di curason. Su popularidad inmenso a pone cu su situacion a impacta y nos isla a biba cu ne, for di momento cu el a bay, te ora cu el a bolbe Aruba. Riba orden medico Ruben mester a baha man na trabou, cambia su estilo di bida, p’ asina tin posibilidad pa un miho recuperacion.
Conferencia ‘Briya den bo sapato..” a conta cu sala yen yen
E conferencia relaciona cu Dia di Hende Muhe “Briya den bo sapato y cana pa progreso”, a conta cu un un sala completamente yen, unda varios orador a hiba palabra riba e temanan relevante relaciona cu e dia special aki. Nomber di oradornan tabata entre otro e conocido artista Maite Delgado, ex prome minister Maria Liberia Peters, y tambe minister Xiomara Ruiz Maduro, e parlamentarionan Marisol Lopez Tromp y Jennifer Reyes, y e persona encarga cu e programa di e proyectonan duradero Varelie Croes.
Xander Bogaerts a bolbe briya
E pelotero profesional di Aruba Xander Bogaerts a bolbe briya e aña aki, ora cu hunto cu e ekipo di Boston Red Sox, a logra gana Serie Mundial di Baseball Grandes Ligas. Esaki ta e di dos biaha cu Xander Bogaerts ta pasa den e experiencia grandi aki y cu ne, e di dos biaha cu e ta haya e renchi cotidia como recompensa. E renchi ta e premio mas cotidia pa cada pelotero profesional y cu e edad hoben di Xander y siendo un Arubiano, e renchi tin hopi mas balor.
E Prome Doctorado di Papiamento
E logro di dr. Joyce Pereira ta pasa pa historia pa e comunidad educacional y di cultura. Dia 15 november ultimo, Aruba a conoce e prome doctorado di Papiamento, dr. Joyce Pereira na University of Curacao (UOC), den un aula completamente yen, cu su tesis titula “Valorization of Papiamento in Aruban society and education, in historical, contemporary and future perspectives.” E contenido di e tesis en general ta un compilacion di resultado di varios aña di investigacion di posicion di idioma Papiamento den sociedad y nos sistema educacional na Aruba. Sin duda, hopi di esunnan presente por a biba y recorda varios momento emocional. Incluso hopi por a reflexiona riba nan propio experiencia den pasado na scol y e retonan cu nan a encontra cu e limitacion y forma di impone un idioma stranhero. Aruba completo por sintie orguyoso cu nos tin e prome persona y dama na Aruba, Corsou y Boneiro, cu tin e titulo di doctorado den Papiamento.
Aruba anfitrion pa renobacion di matrimonio riba beach
Den luna di augustus Aruba un biaha mas a fungi como anfitrion pa riba 500 invitado, bin renoba nan promesa di matrimonio. Aña 2017 Aruba a organisa esaki pa prome biaha y e resultado tabata grandi y ta bou di auspicio di oficina di turismo di Aruba. E parehanan tabata varia di pais, manera: Alemania, Italia, Brazil y varios parti di Merca. E cadena di noticia internacional CNN tabata na Aruba riba e fecha mes y a haci un raportahe en bibo cu e organisador di boda, sra. Lissy Lampe, promoviendo e evento como tambe e trabou cu Lampe ta haci.
Aruba anfitrion pa e revista internacional Sports Illustrated ‘swimsuit’ edition 55
Pa e di 55 edicion di e revista internacional renombra Sport Illustrated su edicion di trahe di baño, a scoge Aruba como un di e sitionan principal di shooting. A haci uzo di e paisahenan romantico di Aruba y Bahamas, unda cu a ilustra un serie di modelo internacional, manera: Kate Upton, Aly Raisman, Alexis Ren, Sailor Brinkley (yiu muher di ex modelo di SI, Christie Brinkley), Paige Spiranac y mucho mas. E revista tin mas di 70 miyon lector adulto internacional y den e edicion aki tambe tabatin e prome photoshoot di un atleta paralimpico.
Jeon cu un aña exitoso
E conocido cantante local Jonathan Thiel, ‘Jeon’, dilanti un publico grandi riba tereno di ex John F Kennedy School, a presenta un chispa di e video clip di su cantica Machika., di cual despues lo lansa e version internacional cu J Balvin. Jeon a uni cu J Balvin pa un gira internacional den cual Jeon por presenta como parti di e apertura, fuera di forma parti di e cancion Machika. Algun siman atras, Aruba por a presencia e cantica aki en bibo durante Island Take Over. Y pa finalisa a bin e grato noticia cu un di e cancionnan internacional cu Jeon a co produci pa e cantante di Reggaeton, Nicky Jam, tabata nomina pa un premio Grammy Latino. Mientras cu e no a logra bay cu e premio, e solo hecho di a keda nomina, tabata un logro inmenso pa e yiu di tera hoben aki. Sin duda, un aña internacional grandi pa e homber di mondi, Jonathan ‘Jeon’ Thiel.
Mas di 300 hende a forma parti di e ‘Girls Night Out’ di Fifty Shades Freed
E prome evento di The Cinema 2018 a resulta den un exito total. The Cinema y Tropical Bottling Co. a organisa un Valentine’s Night Event specialmente p’e hendenan muhe pa asina set e ambiente pa Dia di San Valentino. The Cinema a haci un evento chikito cu e pelicula di Fifty Shades Freed, caminda e prome 100 persona, cu a cumpra nan ticket, a ricibi un goodiebag for di sextasy. Pero loke no a spera ta, cu finalmente mas di 300 hende a presenta, specialmente door cu e pelicula di Fifty Shades Freed ya tabatin 1 siman ta andando.
