HIGHLIGHTS 2018
Michella Rasmijn
Su experiencia poco agradabel como mucha na dentista, a marca su pasonan pa kier haci un diferencia como dentista. Como hende muher e ta encanta tattoo y cu e stigma contra tattoo ta kibrando pocopoco den nos sociedad, mirando cu como profesional esaki no mester tin niun influencia den bo prestacion. Michella ta lamenta tambe cu e ta wak hopi negligencia, pa loke ta trata cuido bocal di nos muchanan.
Osyth Henriquez
Su imaginacion y determinacion den mundo di turismo, a pone cu Osyth ta un dama emprendedora, semper cu un sonrisa riba su cara y brindando un trato masha caluroso y cordial. Su trayecto a inicia cu e restaurant The Old Man and the Sea y for di eynan e idea di Ocean Villas, bungalows di palo, a nace. Loke ta haci cada bungalows mas unico y autentico ta cu e decoracion di interior ta su creacion y pasion.
Maureen Kelly
Como mama di un yiu autista, nos sa cu e lucha ta enorme, specialmente na Aruba. For di momento cu el a wordo nomina pa FOCUS/ PANTENE Inspiracion 2017, el a sinti cu tur su esfuerso cu el a y ta hinca den su yiu muher autista, a haya atencion di otro hende y cu su determinacion ta haya admiracion y inspiracion p’e mes y pa tur otro mama cu tambe tin yiu autista.
Evelyna “Evelyn” Wever Croes
Evelyna ‘Evelyn’ Wever Croes ta marca historia politico como e Prome Dama cu e titulo di Prome Minister Presidente di Aruba. E retonan cu su persona a y ta confrontanto den su funcion ta amplio y como Minister Presidente di e pais Aruba, su vision ta pa crea un mihor Aruba pa tur ciudadano, irespecto unda bo a nace. Proteccion pa esnan mas vunerabel, oportunidad husto pa tur y un bon gobernacion.
Nathaly Maduro
Nathaly Maduro y Leoni (Noni) Brokke tin un relacion di 5 aña y mey, na momento cu Noni a hay’e confronta den un accidente grave, unda nan bida a cambia completo. El a comparti 6 luna cu Noni na Colombia y tur dia e tabatin un rutina di cuido cu Noni. Nan ta uza Facetime tur dia pa mantene nan relacion di distancia.
Mitch Almary
Den luna di maart Mitch Almary a sali ganado di Festival Un Canto pa Aruba su Himno y Bandera y a presenta un tremendo cancion ‘Agente di Paz’, cu ta conta tocante con nos mester bira soldad di paz den pueblo. Su mensahe tabata cu un pueblo cu tin paz, ta un pueblo cu por traha hunto y trahando hunto nos lo por logra hopi mas pa nos pais. Un cancion cu a toca curason y trece emocion cerca nos hendenan.
Hilyann Croes
Su tata, e legendario Hilward Croes (den feliz memoria) tabata su compas y lamentablemente el a fayece net durante e temporada di su transformacion crucial. No tin un dia cu Hilyann ta sinti su falta y semper e lo keda cu e bunita recuerdo di por tabata riba portada di FOCUS hunto cu su tata. Awo e ta den pleno desaroyo den su area profesional y apoyando su rumannan den tur locual cu nan ta haci.
Edwirah Brete
Den pleno hubentud, deslumbrando su encanto como modelo y logrando varios premio, Edwirah a hay’e ta enfrenta maternidad cu 17 aña. Awendia e ta un entrepreneur exitoso di su peuterschool Jelly Kids y mama di 3 yiu. Cada yiu a hereda un talento of caracteristica di dje. Edwirah ta completamente di acuerdo cu mester bin mas control riba e peuterschool na Aruba, p’asina garantisa calidad di cuido na esunnan mas chikito y vunerabel.
Luisa Ecury
Salud mental na Aruba sigur ta un topico hopi taboo ainda y Luisa kier kibra esaki. Pa hopi aña el a biba den un cas, unda cu tur hende tabata cana riba ‘eggshells’, ya cu a diagnostic’e cu Borderline Personality Disordre (BDP) severo. For di su 8 aña su mayornan a cuminsa sinti cu tin algo mas serio cu ne y ora el a drenta pubertad, el a bira pio.
Lorena Bikker
Como stranhero el a compronde mesora e importancia di adaptacion y respet pa Aruba su custumber, cultura e idioma, for di momento cu el a muda bin biba na Aruba. Su funcionnan ta den balans y ta percura pa semper tin calidad di tempo tanto den su trabou profesional, mama y casa, a pesar cu un di e retonan mas grandi ta, e espacio pa nan bida personal a bira menos.
Randy Ray Hernandis
Semper Randy tabata sinti mas p’e banda femenino, pero no por a haya e momento corecto pa tribi di sali afo y bisa esey. Despues cu el a carga e titulo di Prins Milk hunto cu su ruman morocho Pancho Snake (Roberto), el a habri mas cu su ruman, contando e tocante su orientacion sexual y cu su soño tabata pa competi pa Miss Gay Aruba. Na 2018 el a realisa su soño y a competi bou di e nomber di Miss Gay Dita von Teese, unda el a logra e titulo di Best Makeup 2018.
