Diasabra ultimo durante un cena special, den e elegante ballroom di Hyatt Aruba Regency Resort & Casino, e miembronan di Kiwanis Club of Aruba, a bini hunto pa celebra inicio di un aña nobo. Durante e celebracion a reflexiona riba e prome tres lunanan di e aña Kiwanistico 2018-2019 y e proyectonan cu a wordo realisa

E Presidente di Kiwanis Club of Aruba, Edalitza Weller, a gradici tur e miembronan pa nan tempo, amor incondicional y dedicacion duna na e club y e comunidad di Aruba. El a elabora riba e proyectonan exitoso realisa pa Kiwanis Club of Aruba manera; Paga Tino “School Traffic Sign” na 24 scol basico na Aruba, No Sconde Mas info sessions, Global Money week Aruba, DCM Aruba, Celebracion di dia Universal di Derecho di mucha, Pasco den Bario, proyecto pa recauda fondo pa Fundacion “Ban Uni Man pa Cria nos Muchanan y Kiwanis Hands On Day cu a tuma lugar na Colegio Felipe B. Tromp conhuntamente cu e otro clubnan di Kiwanis na Aruba.

En total den e prome 3 lunanan a sirbi 1131 hora dedica na e comunidad y país Aruba. Como tambe e donacionnan cu a wordo haci na e instancianan; Stichting Thuiszorg y Grupo Scout Cacique Macuarima. Awendia no ta facil pa mantene un fundacion riba pia y ta exigi hopi tempo, esfuerso y dedicacion pa por logra e metanan. P’esey Kiwanis Club of Aruba ta haya sumamente importante pa aprecia y duna sosten na e fundacionnan aki, p’asina nan por sigui eherce e trabou debidamente, cu ta na bienestar di nos muchanan y pais Aruba.

Kiwanis Club of Aruba a duna un reconocimento na e miembronan cu tin 25 aña sirbiendo e comunidad di Aruba “Legion of Honors” a keda otorga: sr John Every, sr Gordhan Kimatrai, sr Ray Farro, sr Carlos Albertus, sr Leslie Tweeboom, sr Robert Nieuw y sr Robert Spellen.
E miembronan a wordo sorpresa cu un dande di e grupo Tipico Pegasaya. E anochi tabata uno ameno, cu un toke carnavalesco y entrenamiento tabata den man di Metropolis.

Kiwanis ta un organisacion global di boluntario dedica na mehora mundo via un mucha y via di un comunidad cada biaha y tin como lema: sirbiendo e muchanan di mundo. Pa mas  informacion di Kiwanis Club of Aruba por bishita nan pagina web www.kiwanisclubofaruba.org.

LEAVE A REPLY

Please enter your comment!
Please enter your name here