Esaki ta 8 aña consecutivo cu Michelle Begin ta organisa su ‘Ms Canada Beach Volleyball’ & ‘Silent Auction’ pa recauda fondo pa entrega na diferente institucion of persona den necesidad na Aruba. E aña aki e actividad ta tuma luga diadomingo dia 10 di maart di 11or di mainta pa 4or di atardi. Esaki ta e prome aña cu Ms Canada ta join Aruba Volleyball Association pa asina e actividad bira un exito total un biaha mas.


Michelle Begin y su casa Jean, den feliz memoria, a ricibi e prome Emerald Ambassador Award na aña 2015 otorga pa Aruba Tourism Authority. Lamentablemente Jean a fayece despues di un lucha contra di enfermedad di cancer. Michelle a sigui bin Aruba tur aña y ta organisa su beach volleyball cu hopi amor pa recauda fondo.

Michelle ta encanta y stima Aruba, su hendenan amabel, servicial y caluroso. Ademas di e clima, tambe e ta fascina cu e lama unico y sin lubida di e arte culinario exkisito cu e restaurantnan di Aruba ta ofrece. Durante e 41 añanan cu e ta bishita Aruba, Michelle a cera conoci cu hopi hende y algun te cu awendia e ta considera como su ‘best friends’. E mensahe di Ms Canada pa nos isla ta, cu si nos uni, nos por haci un diferencia y logra hopi mas pa e pida baranca aki. Por bishita e facebook page di Ms Canada Charity in Aruba pa haya mas informacion di tur e actividadnan.

LEAVE A REPLY

Please enter your comment!
Please enter your name here