Un cara hopi conoci na Aruba nos por corda Milda Tromp como nos flamante Reina di Carnaval 1988. Loke hopi hende no sa di Milda ta, cu e ta un ruman ehemplar y pa su bunita curason y dedicacion, el a ricibi e premio di e “Deseo pa Pasco” otorga pa ENNIA. E tabata un gran sorpresa, pasobra Milda no tabata sa nada nada!
E “Deseo pa Pasco” por tabata cualkier cos. Desde un cama nobo, un desayuno di Pasco pa un grupo menos afortuna, un keiro di un dia, hiba un nieto den exterior, drecha un dak, drecha un auto, etc… tur locual cu un hende tin e deseo den su curason cu e kier cumpli. Den tur e deseonan cu a drenta, a selecciona esun cu mas a haci un impacto. E ganador di e “Deseo pa Pasco” di ENNIA a resulta Milda Tromp, cu su prima Elaine Geerman a dedica e siguiente deseo:
E deseo di Elaine Geerman; “Mi subrina Milda Tromp ta esun mas jong di su famia y tin 3 ruman mas grandi, cu ta ‘verstandelijk gehandicapt’. Milda mes tin 3 yiu y su mayornan a fayece. Nan tur ta biba den un cas y Milda ta cuida y traha ‘full-time’ pa mantene henter e famia. E no ta bay nunca cu vakantie y temporada di Pasco, e ta percura pa e cas ta bunita decora. Mi lo desea cu e por bay cu vakantie cu su yiunan, pasobra e mes no por pag’e y e merece esaki”.
Momento cu Milda a haya sa cu su prima Elaine a manda su nomber pa ricibi e premio aki, e tabata un sentimento masha bunita y cu hopi emocion, pasobra nunca e por a pensa cu su prima por a haci algo asina p’e. Su prima sa di su situacion y den tur loke e ta bibando, pero cu el a yega asina leu di pidi un deseo p’e, ta algo hopi hopi bunita y cu hopi emocion. Cu e premio di “Deseo pa Pasco” awor Milda hunto cu su yiunan ta bay disfuta di e vakantie tan anhela. Milda ta den edicion di FOCUS di maart y ta conta con apesar di tin hopi reto, e ta sigui dilanti cu su famia.
