Lieshandra Farro su trayectoria den mundo di beyesa a inicia for di trempan, na momento cu el a participa den Little Miss Aruba 2007. For di eynan Lieshandra a sa di demostra su encanto riba pasarela y mundo di beyesa y a sigui amplia su experiencia participando na diferente certamen y a logra e titulonan. Pa Lieshandra e logro mas grandi te awor ta di por a logra 3 titulo maximo y asina obtene 3 corona den menos cu 1 aña, pues den e temporada di juni 2012 pa februari 2013: Pre-Teen Aruba 2012, Beauty of the World 2012 na Republica Dominicana y Preteen Belleza America 2013 na El Salvador.
Lieshandra ta representando Aruba den e certamen di Teen Universe 2019 cu ta tumando lugar na e ciudad di Panama, Panama, for di dia 24 pa 30 maart 2019. Su experiencia te cu awor ta uno hopi agradabel. El a siña conoce otro persona y asina siña conoce otro carácter-, cultura- y tradicionnan. El a cera amistadnan nobo y hopi diferente cos, cu sigur lo yude crece mas como hoben y ser humano. E certamen pa elegi Miss Teen Universe ta mayan y por sigui esaki riba facebook di Teenuniverseint cuminsando pa 8or di anochi.
Con e reaccion ta pa nos Teen Universe Aruba?
Mi tin di bisa honestamente cu mi a haya un reaccion super agradabel unda tur hende ta yama mi e Barbie Caribeña, cu sigur ta haci mi sinti sigur di mi mes. E ta duna mi tambe e extra push pa mi sigui traha cu mas amor pa laga Aruba su nomber sigui resona aki na Panama.
Di tur e actividadnan cua bo a gusta mas?
Tur actividad sigur ta diferente na e otro, pero e actividad cu mas mi a gusta te cu awor sigur ta e Bishita na Canal di Panama, cual a asombra mi hopi con ManPower por haci un mega construccion y conecta 2 oceano hunto.
Ki nos por spera di e certamen final?
Di e certamen final sigur por spera un Lieshandra Farro sigur di su mes, cu lo duna 100% di su mes manera semper, pa asina Aruba keda bon representa. Mi lo compromete na haci mi maximo esfuerso pa mi sali truinfante cada salida y presentacion.
Hunto cu Aruba cua ta e otro faboritonan pa e corona?
Personalmente cada un representante ta digno di representa nan pais. Cada un tin nan propio beyesa, aunke mi ta kere cu Panama, Mexico, USA y Brazil.
Cuanto candidata ta compitiendo y ki ta e criteria di e certamen?
En total ta 28 candidata compitiendo pa e titulo di Teen Universe 2019. E criteria specifico ta keda un misterio, paso en realidad niun hende por bisa cu siguridad ki ta e criteria pa cu esaki, pero mi tin FE y cu Poder di Dios cu Aruba lo ta den e top 16 sigur cu e bendicion di Dios na prome lugar.
