Un bon biña y hors d’oeuvres exquisito ta bay hunto pa e paladar exigente durante un encuentro placentero riba un diabierna atardi. Esaki tabata e combinacion perfecto na DIVINO na e di segundo ‘wine pairing’ den nan edificio amplio y moderno na Eagle. Nan a tene bon na cuenta cu momento cu ta combina apropiadamente biña y cuminda, e capacidad pa realsa e sabornan y rindi henter un experiencia di e sabor ta hopi mas placentero.
Durante e ‘wine pairing’ e amantenan di un bon biña tabatin e placer unico pa disfruta di mas cu 40 diferente tipo di biña obtenibel na DIVINO. E staff di DIVI RESORTS a percura pa e catering cu tabatin entre otro; ceviche, scallops, lamb slider y short ribs, cu tabata sirbi perfectamente pa deleita e paladar di tur hende presente. Interesante di esaki tabata cu tur hende cu a atende e ‘wine pairing’ di DIVINO & DIVI RESORTS a haya via mail un encuesta di e biñanan cu a sirbi durante e evento. E grupo selecto presente sigur a disfruta di DIVINE WINE 2 cu ta laga e expectativa pa e tercer evento!
