En conexion cu Dia di Labor dia prome di mei, Revista FOCUS a haci Nataly SimmonsStanley DabianMaroushka MaduroMaria Carrasquilla e siguiente preguntanan:

1. Ki satisfaccion bo trabou ta duna bo?

2. Ki influencia bo trabou tin den bo formacion personal?


Nataly Simmons – Thompson

Executive Director – Aruba Bank N.V.

1 Den mi trabou actualmente mi ta sinti satisfaccion na momento cu mi por inspira y motiva e empleadonan pa desaroya y progresa den nan trabou, pa nan logra lo mihor den nan bida profesional y personal. Mi satisfaccion ta na momento cu mi logra cultiva un ambiente di respet y igualdad, unda e empleadonan ta traha den ekipo, pa logra e resultadonan.

2 Mi ta traha pa un organisacion solido, caminda tin stabilidad y oportunidad pa sigui desaroya bo mes cu training. No solamente den e ramo di bo experticio profesional, pero tambe training riba e atributonan personal. Nos organisacion ta ofrece flexibilidad, dunando bo e oportunidad, cu bo por traha riba tereno social, dunando bek na comunidad. Tur esaki ta yuda trece e balansa entre mi bida como profesional y personal.


Stanley Dabian

PR y comunicacion na Departamento di Cultura Aruba

1 Mi trabou na Departamento di Cultura Aruba (DCA) ta permiti mi realisa diferente proyecto. E satisfaccion ta, ora cu mi ta sirbi na bienestar di nos comunidad y desaroyo cultural y por eherce e funcionnan pa engrandece nos cultura den su totalidad.

2 E influencia den mi formacion ta, cu a pesar di tur loke por ta sosode of limita na presupuesto, toch nos ta logra ta creativo y activo.Ta haci hopi cu poco y cu ta na satisfaccion di mi comunidad. Durante e añanan mi a siña hopi di loke ta nos cultura y por comparti esaki cu otro cu ta acerca DCA. Mi deseo pa yuda ta grandi y awendia cu mi 22 aña den cultura y na disponibilidad di mi comunidad, m’a yuda den varios area cultural, educativo y informativo. Cu orguyo y satisfaccion mi ta sirbi tanto na nivel personal y via mi Departamento di Cultura Aruba na nivel profesional.


Maroushka Maduro

Management team di La Salle College y docente

1 Na caminda den bida a haya e yamada tambe pa haci trabou di directiva, pero semper cu e hoben den mente. Duna les na hoben, percura pa nan compronde e materia, motiva nan, educa nan y duna nan e atencion cu nan merece, esey ta mi satisfacion. Y mas ainda ora cu nan caba Mavo y bo wak e sonrisa ey riba nan cara na momento nan haya nan diploma. Esey ta e satisfaccion mas grandi cu por tin.

2 Den nos trabou no solamente nos como docente ta aporta na forma nan como ciudadano consciente, pero nan tambe alabes, door di vocifera nan opinion y nan manera hopi biaha asina simpel di wak cos, tambe ta yuda nos den nos formacion personal.


Maria Carrasquilla

Trahado Social na Fundacion pa Hende Muhe Den Dificultad

1 E satisfaccion cu mi trabou ta duna mi ta cu door di duna e ayudo, sosten, guia na e personanan, cu ta pasando den un situacion hopi dificil, mi por aporta y of haci un diferencia y cambio positivo den e persona y/of e famia nan bida. Y mas satisfaccion ta, ora cu mi ta mira cu e persona por a lanta bek y sali di e situacion dificil y sigui cu un bida nobo y sano.

2 Den mi formacion personal mi trabou a yuda mi compronde mas ainda e hende en general, cu no por of sa con pa sali di e situacionnan dificil. Tambe el a habri mi wowo, pa wak tanto problema social cu nos pais tin. Esey ta duna mi e motivacion y forsa, pa sigui traha y alabes pa mi sigui vocifera pa esnan, cu pa un motibo of otro no tin durf di papia of busca ayudo.

LEAVE A REPLY

Please enter your comment!
Please enter your name here