Diasabra tabata un ocasion hopi special pa e miembronan di Kiwanis Club of Aruba unda nan a honra Sr. Robert ‘Bob’ Spellen durante un recepcion na Fusion Patio, Alhambra. Na e congreso recientemente di Kiwanis International na Stratford – Canada, Sr. Spellen a ser eligi como “Governor” di “Eastern Canada and The Caribbean District” di Kiwanis International pa e aña Kiwanistico 2019-2020, cu lo inicia dia oficialmente dia 1 di october benidero. E lo tin na su encargo pa guia e 247 clubnan di Kiwanis y e clubnan pa di hubentud patrocina pa Kiwanis. Pa Kiwanis Club of Aruba, Bob Spellen ta e di 2 miembro cu ta ocupa e posicion importante aki di “Governor” desde fundador di e club den feliz memoria, Sr Clinton Whitfield.
Durante e recepcion Distinguished Lieutenant Governor di Division 26, Sr. Giantonio Muller, a presenta un oracion di encurashamento y guia pa sr. Spellen durante su aña como “Governor” skirbi pa Herbert Domacassé Sr. E presidente di Kiwanis Club of Aruba, Edalitza Weller, a elabora riba e trayectoria di Sr. Spellen como miembro di Kiwanis Club of Aruba desde aña 1992. El a fungi den diferente posicion manera entre otro presidente na dos ocasion y a logra (Distinguished President), Lieutenant Governor caminda el a logra e distincion di “Distinguished Lieutenant Governor”. Sr. Spellen tambe a “chartered” 4 club di hoben patrocina pa Kiwanis Club of Aruba esta; Aktion Club Sonrisa na 2009, Builder’s Club Mon Plaisir College na aña 2012, Circle K EPI na 2014, y Key Club Colegio San Nicolas na 2015.
E famia di Kiwanis Club of Aruba presente diasabra anochi a haci un brindis despues di algun palabra dirigi pa “Distinguished President” Edbert Schwengle. Pa clausura e parti di ceremonia Sr. Spellen a hiba un discurso caminda el a elabora riba su funcion cu lo inicia dia 1 di october. El a gradici e miembronan di Kiwanis Club of Aruba pa nan sosten duna y alabes Sr. Spellen a gradici su esposa, Sra. Mary Spellen, pa e apoyo di semper brinda na su persona. Kiwanis Club of Aruba ta orguyoso di e logro di Sr Spellen y ta desea tur clase di exito den su tarea nobo como “Governor” di Easter Canada & The Caribbean District of Kiwanis International.
