E porta pa e preparacion di reinanan internacional a ser habri, cu e candidata Liane Bonofacia, cu Endy Croes tin e honor di yuda den su preparacion. Liane ta concursa otro siman diahuebs 20 di juni pa e corona di Miss Curacao 2019. Endy ta convenci cu Aruba tin e expertonan di beyesa, cu por traha hunto na un preparacion integral di un reina. E recomendacion pa Laine tuma contacto cu Endy Croes tabata atrabes di un di e personanan clave cu ta guia Liane den su preparacion na Curacao, Cerrel Poulina. El a recomenda Liane pa tuma contacto cu Endy, basa riba su trayectoria como preparador di reina na Aruba. Nan a establece e contacto y a ‘spreek af’ cu Liane lo bin Aruba pa 1 siman pa prepara pa e certamen final di Miss Curacao.
E preparador di reina, Endy Croes, a splica na FOCUS Online cu Liane ta na Aruba netamente pa su preparacion integral di reina. Esaki ta encera e aspectonan mental, actitud, siguransa, proyeccion y pa haci su abilidad pa vocifera su opinion riba escenario di forma mas fuerte. Pa e look di reina Roberto Avalo y su team di The Salon Aruba, tabata na encargo pa haci e cambio di cabey cu ta faborece Liane mas mientras cu e resto di cambio fisico ta bou su mesun encargo. Liane lo pasa door di varios sesion di fotografia pa asina traha mas riba su aspecto fotogenico tambe. Pa e anochi final Endy lo ta presente pa haci cabey y makeup pa Liane Bonofacia.
Liane ta un dama hoben sumamente inteligente y elocuente den su vocabulario. Como psicologo di profesion, Liane tin e capacidad pa mira un situacion di un angulo mas profundo. Liane ta un persona cu un base familiar hopi fuerte cu ta haci cu por traha hopi bon cu ne, pasobra su famia ta dune e respaldo necesario pa cosecha exito. Banda di un figura espectacular, Liane su siguridad riba pasarela ta un pluspunt grandi p’e, segun su preparador Endy Croes.
Nos a puntra Endy cua ta un ex-miss cu Liane tin cierto parecido: “Liane ta laga mi corda hopi riba Miss Aruba 2016, Charlene Leslie, cu su preparacion pa Miss Aruba y Miss Universo tambe tabata bou di mi encargo. Tur 2 tin caracter suave, pero sa hopi bon kico nan kier y por formula opinion cu peso y contenido. Den apariencia, Liane ta laga mi corda riba un otro Miss Aruba, Gillain Berry, cu tambe a hala hopi atencion na Miss Universo na Brazil”. Hopi exito na Liane na e certamen di Miss Curacao 2019 y sigur e ta bay score cu e guia ricibi for di e team fuerte di experto na Aruba!
