Pa un presunto sobredosis, e noticia a cuminsa plama for di fuente cercano di e famia cu a declara na New York Times cu Saoirse Kennedy Hill di 22 aña di edad, a ser haya inconscientemente den su cas na Hyannis Port na Massachusetts, diahuebs madruga 1 di augustus. Mesora el a ser hiba pa hospital Cape Cod, unda el a muri algun hora despues sin duna di conoce e causanan di su fayecimento. Saoirse ta yiu di Paul Hill y Courtney Kennedy, y tabata studia comunicacion na Boston Collage.
E problemanan di depresion y enfermedad mental cu Saoirse tabata sufri, a bira conoci na 2016 tempo el a skirbi esaki den e corant estudiantil Deerfield Academy. El a confesa cu su depresion a cuminsa domina for di principio di su prome añanan di high school, y lo sigui cu ne pa resto di su bida. Aunke en general e tabata un mucha muhe feliz, el a sufri episodionan di profundo tristesa cu tabata lag’e sinti manera un baranca pisa na su pecho, tambe el a revela cu el a ser agredi sexualmente.
Su tata Paul Hill a keda cera 15 aña den prisin door cu el a ser acusa di ta involucra den bombardeonan di e ehercito republicano irlandes. Despues di ser exonera di tur e cargonan, el a casa cu Courtney Kennedy na 1993, e di cinco di e total di 11 yiu cu a ser procrea pa e matrimonio forma pa Ethel Skatel y Robert F. Kennedy, cu a ser asesina mientras e tabata senador pa New York dia 6 de junio di 1968. Además, e tabata ruman di John F. Kennedy, presidente number 35 di Estados Unidos y cu tambe a ser asesina dia 22 de november 1963, mientras e tabata biaha den un convertibel hunto cu su casa Jacky Kennedy den e estado di Texas.
E comienso di e siman aki riba dialuna 5 di augustus, e restonan di Saoirse a ser hiba na su ultimo lugar di sosiego. Su wela materno, Ethel Kennedy di 91 aña y sus mayornan, Courtney Kennedy y Paul Hill, cu ta divorcia desde 2006 a mustra hopi tristo y conmoví na e entiero di Saoirse Kennedy Hill.
