Prinses Amalia Basisschool, antes conoci como Reina Beatrix Dependance, a inicia den e aña escolar 2011 – 2012, bou di guia di juffrouw Mireya Nicolaas-de Haseth. E nomber ‘Prinses Amalia’ ta para como simbolo, cu nan ta bin di e famia real di Reina Beatrix y hunto cu algun colega di juffrouw Mireya, a scoge e colornan di e scol, cu ta representa nan identidad: fuxcia, berde fel, biña y oranje.
Prinses Amalia Basisschool tin varios actividad extracuricular, cu ta aporta y faborece desaroyo y crecemento emocional, fisico y cognitivo di su alumnonan. E team ta consisti di 27 miembro bon motiva, cu ta traha hunto pa saca e potencialnan di e alumnonan. Y sigur tin dos actividad cu Prinses Amalia a destaca den dje pa algun aña caba y esaki ta danki na e tremendo sosten y dinamismo di e docentenan y e mayornan. Prinses Amalia Basisschool ta e unico scol cu a gana 4 aña tras di otro e competencia di Mente Inteligente. Y den e parti di deporte, Prinses Amalia Basisschool a gana dos biaha (2016-2017) Premio Excelencia den Deporte, como e scol basico cu mas a destaca den deporte durante e aña.
MENTE INTELIGENTE
Juffrouw Sonia Raghunath – Sue, como cabesante suplente shete aña pasa, a dicidi pa yuda e maestra di klas 6 cu e competencia bon conoci Mente Inteligente y tabata e prome biaha cu Prinses Amalia Basisschool a participa, unda nan a sali den e top 4 scolnan. E siguiente aña, juffrouw Sonia a dicidi cu e lo prefera di ta den klas y el a haya klas 6 y a opta pa bolbe prepara e muchanan pa e competencia, unda a bolbe keda den e top 4. E preparacion pa Mente Inteligente ta exigi hopi riba e conocemento general di mundo di e muchanan y esey ta keda un reto sigur, ya cu nos muchanan no ta custumbra di lesa of wak noticia internacional. Pa e di 4 y 5 aña cu e scol ta participa, ya por a mira un adelanto pa loke ta trata conocemento general di e muchanan como tambe envolvimento di e mayornan. Ambos aña nan a logra sali campeon y unabes cu sinti e satisfaccion di ta campeon, e presion pa keda campeon, a cuminsa crece cerca e muchanan. “Nos a train e muchanan pa tin confiansa den nan mes y pa nunca “give up”. Tambe pa respeta tur otro scol, cu nan ta hunga contra dje y semper tin bon manera p.e. cuminda tur hende etc. Tambe pa por “deal” cu perde ora di competi. E mester keda leuk pa nan, gana of perde ta parti di competi”, jufr Sonia a expresa.
JUFFROUW SONIA RAGHUNATH – SUE
Juffrouw Sonia tin 38 aña ta eherce e funcion di docente y for di chikito e kier a bira un maestra, prome di ballet, despues di deporte y finalmente juffrouw di scol basico. El a cuminsa traha na Reina Beatrixschool y a traha den 1ste, 4de, 5de y 6de klas y tambe a eherce e funcion di juffrouw di proyecto Prisma y tabata cabesante suplente tambe na cuminsamento. A pesar cu juffrouw Sonia ta streng, cada bes e muchanan ta sorpres’e, ora cu nan bin bis’e, cu nan ta aprecia kico e ta haci pa nan y cu e ta yuda nan pa yega na e siguiente stap den nan bida. E ta gusta con nan team ta traha hunto y con tur hende ta yuda otro.
PREPARACION MENTE INTELIGENTE
E preparacion pa Mente Inteligente ta sosode ora di scol den pauze. Ta papia cu e muchanan pa wak noticia y pone atencion kico ta pasando na Aruba y na mundo. E tactica cu ta uza, tambe ta bay den dialogo, con nan mester hunga y cu mester traha hunto como un team. Segun jufr. Sonia nan ta gana y perde hunto como un team y nan no ta reclama otro. Hopi importante ta pa e muchanan tin confiansa den nan mes y nunca “give up”, ni ora nan ta perdiendo. Tin placer den e wega ta importante y gana of perde mester keda sportief. Tur esey ta parti di e wega y jufr. Sonia ta percura pa e muchanan compronde esey hopi bon.
“Nos ta contento ora nos gana, pero gana no ta tur cos. Con pa anda ora nan perde y con pa comporta tambe ta hopi importante”.
Jufr. Sonia
EXCELENCIA DEN DEPORTE
Durante e añanan e scol tabatin diferente logro y nan ta participa den tur deporte cu IBISA tin riba nan calender y esey ta na encargo di meneer Alvaro Maduro. Como scol bo ta sali campeon den diferente deporte of den premiacion y tin biaha den nada. Meneer Alvaro ta considera e logro di mas grandi y importante, esun cu nan por laga e muchanan conoce y experiencia e deportenan, cu nunca nan a haci. “E caranan contento, e sonrisa, e satisfaccion cu bo ta mira, ta locual ta haci ami como docente contento,” Alvaro a comparti. Nan ta percura pa motiva y stimula e muchanan, pa participa mas cu por. Nos ta enfoca hopi riba muchanan cu NO ta activo den un club deportivo of den un disciplina, pa asina duna nan oportunidad pa experiencia e deportenan cu IBISA ta organisa durante e aña escolar. Cu e speransa pa un dia nan por desaroya amor pa deporte. Apart di e deportenan, baile tambe ta un di e temanan di movecion. Pa cu esaki tambe scol ta presenta na p.e. apertura di Festival di Buki, Weganan di Rey y na diferente presentacion na scol mes.
Resultado no ta esun di mas importante pa nan, pero si enfasis riba disciplina, respet pa cu otro y pa cu e scol contricante.
MENEER ALVARO MADURO
Alvaro Maduro desde hoben a bay studia na Hulanda y a caba Cios: Sportcoördinator Geüniformeerde Beroepen (instructor pa scol di polis). Na 2008 el regresa Aruba y a traha 5 aña como instructor di deporte na IBISA. Cu IBISA el a traha na diferente scol, entre otro Reina Beatrix, Pius X School, Colegio Frere Bonifacius, Colegio Bon Bini, St. Anna School, Cacique Macuarima School, Maria Gorrettischool y Kukwisaschool.
Despues el a traha 4 aña como instructor di deporte na KIA (Instituto Coreccional Nacional), unda su tarea tabata pa duna deporte na e presonan, motiva y stimula nan, pa ta activo y positivo durante nan encarcelacion. Meneer Alvaro ta haya cu deporte y movecion ta hopi esencial pa un mente positivo. Banda di su trabou na KIA, Alvaro tabata studia (deeltijd) na IPA pa docente di Movecion y Salud.
Desde 2017 meneer Alvaro ta docente di Movecion y Salud na Prinses Amalia Basisschool y den su tempo liber, e ta miembro activo di directiva di Centro di Bario Noord Baseball Organization, unda tambe e ta coach e muchanan di liga menor di nan organisacion durante henter e aña.
“Mi ta considera mi mes un meneer straight, cu hopi amor y dedicacion pa su profesion y tin biaha hopi streng. Como unico docente masculino na scol, hopi biaha mi ta fungi tambe como rol di tata pa nos alumnonan”.
Mr. Alvaro
PREPARACION DEPORTE
E preparacionnan ta cuminsa na scol durante e lesnan. E lesnan ta basa riba habilidad, conocemento di e wega, tactica y colaboracion. Ta pone algun training despues di ora di scol, pa e muchanan por conoce otro, practica y haya confiansa, pa asina representa scol den e deporte cu ta na turno. Meneer Alvaro hunto cu juf. Rexylaine cu semper t’ey, pa sea training of na tur e weganan di deporte escolar, pa apoya y tambe coach e muchanan. E meta ta keda pa e muchanan di Prinses Amalia Basisschool sigui participa y experiencia. Plan pa futuro ta pa sigui brinda oportunidad na tur mucha, sin distincion, pa asina nan experiencia deporte y e disciplinanan. Esaki ta pa motiva y stimula e muchanan, pa sigui haci deporte y kisas den futuro afilia na un federacion den nan tempo liber. A traves di Alvaro su profesion, e kier encurasha e alumnonan mas hopi posibel pa ta activo den un deporte durante ful e aña escolar y crea asina ciudadado ehemplar pa futuro.
