E organisacion di e popular Caribbean Sea Jazz Festival (CSJF) ta presenta Casibari Jazz Festival Aruba 2019 riba 20 y 21 di september proximo. E fanaticonan di CSJF lo reconoce e mesun ambiente musical cu artistanan manera Michael Bremo, Robert Jeand’or, Oruba cu Reno Stebo y Tania Kross cu ta canta cu Randal Corsen.
E organisador Erik Eman a bise cu e ta sumamente impresiona cu e ayudo cu nan a ricibi di nan fanatico-, sponsor- y amigonan, cu pa 12 aña tabatin CSJF den nan curason y awor ta sostene nan iniciativa nobo Casibari Jazz Festival Aruba 2019. Manera conoci e aña aki CSJF no por sigui pa falta di subsidio. E bashi cu esaki a laga atras, tambe bou musiconan local cu ta sinti falta di un stage grandi cual nan tabata por comparti cu musiconan internacional, a inspira Eman pa bin cu un alternativa. Aunke mas chikito y cu menos streya internacional, Casibari Jazz Festival Aruba 2019 lo duna e publico e mesun ambiente cu artistanan riba nivel halto, cuminda y arte. E ta laga bo corda di e ambiente den e prome añanan di existencia di CSJF.
Artistanan cu lo presenta riba diabierna 20 y diasabra 21 september ta: Tania Kross y Randal Corsen lo presenta hunto cu Dibo D y Aruban String Quartet, Tony Succar kende ta canta cu Robert Jeand’or, Antonio Bello & Friends, Count Tutu y tambe Ará Caribbean Jazz Sextet. Casibari Jazz Festival Aruba 2019 lo tuma luga na Casibari Rock Formation, un luga unico cu yen historia. Tin dos stage: Do it Stage & Balashi Stage. Ademas e publico por disfruta di diferente cuminda na e food court, coffee & whiskey lounge, festival di artesania y un salsa workshop.
