ILEYNA DE CUBA

MISS TEEN INTERNATIONAL ARUBA

Ileyna a carga e corona tanto di Reina Infantil como Reina Hubenil, cu ta dos titulo maximo den celebracion di nos Carnaval. Segun su preparador, Endy Croes, door di su experiencia den eleccion di reina, Ileyna conoce escenario y ta briya mas, ora e ta riba escenario. Aunke e preparacion pa miss ta ful diferente cu ora di bay pa reina di Carnaval, toch e ta kere e sentimento riba stage ta keda mescos y Ileyna sa di probecha di esaki. E siguransa cu Ileyna a refleha riba escenario, ta loke a pone sobresali. E tabata sa precies kico el a bay haci riba escenario y esey el a haci cu tur siguridad den su mes. E corona di Miss Teen International Aruba 2019 ta un logro cu Ileyna y e team a traha duro p’e, cu hopi dedicacion y determinacion.

ISABELLA BENSHOP

MISS YOUTH ARUBA

E impacto di Isabella ta uno cu a traha duro riba dje, pa e saca e mihor proyeccion posibel riba escenario. El a crece di un hoben hopi ‘shy’, cu ta sali di e mundo di deporte, pa bira un dama cu un elegancia y porte na nivel di un Miss Universo. Isabella mester a pone un tiki mas enfasis riba su parti corporal y el a baha 22 liber en total. Esaki a tuma hopi dedicacion y determinacion di su parti, pa asina e tene su mes na e plan estricto cu e mester a sigui. Su diseñador, Endy Croes, a warda p’e baha mas peso cu tabata posibel y un siman prome cu e anochi final, a haci e diseño. E color blanco pa e diseñador ta cuadra cu Isabella su caracter. Verena Lian hunto cu 3 ayudante a traha di dia y anochi pa e decoracion ta ful cosi riba e base di e shimis.

DANNA GARCIA

MISS UNIVERSE ARUBA

Cu 15 aña Danna a cuminsa como modelo di KOMA y cu 16 aña el a conkista e corona di Miss Teen Aruba International 2016. E tabatin e honor di representa Aruba na El Salvador, unda el a gana e titulo di Virreina de Las Americas. E experiencia aki tabata unico y el a conoce hopi hende y siña hopi di e otro cultura- y caracternan. Riba e pregunta: “Kico Miss Aruba Universe tin como un deseo, cu e ta desea di cumpli?”, el a contesta: “Semper mi tin mi metanan pa cumpli durante un aña. Mi ta skirbi nan riba un papel y mi ta traha, pa asina mi por logra nan. E deseo cu mi kier mira cumpli ta, pa representa Aruba super bon den exterior y si Dios duna mi e oportunidad, mi lo kier clasifica of bin cu e corona universal, pa asina mi gradici Aruba pa tur loke el a haci pa mi y mi famia.”

GHISLAINE MEIJA

MISS WORLD ARUBA

E gana pa participa pa Miss Aruba 2019 a surgi un siman prome cu e ‘deadline’ pa inscribi. Despues di Miss Teen Aruba, Ghislaine kier a focus riba su scol y despues a sali for di mundo di beyesa y modelahe. Riba e ultimo dia di inscripcion, ainda Ghislaine tabata duda y alrededor di 11or di anochi el a dicidi cu e lo participa toch y cu e ta cla pa un reto nobo. E deseo di Miss World Aruba ta, pa wak su negoshi crece y bira grandi. E kier biba feliz semper y ta un inspiracion pa otro. Su deseo di mas grandi ta, pa wak nos hendenan stima otro, biba mas den union y paz. Nos no mester laga arogancia ni tecnologia gana nos, nos mester ta humilde, feliz y cla pa yuda otro den cualkier momento.

DANIELA PIAZZI

MISS INTERNATIONAL ARUBA

Daniela tabata 1st runner-up di Miss Teen Aruba 2015, unda el a representa su propio compania y semper tabata hopi madura pa su edad. El a siña cu no ta importa bo edad, si bo kier logra algo. Su estudio ta den comunicacion y relacion internacional na Webster University. El a cuminsa den e club di debate di e scol y el a gana e premio nacional di debate na Merca. E ta campeon nacional di debate y su scol ta No. 5 di e pais, unda cada 2 siman e ekipo ta biaha pa haci debate cu otro scol di prestigio. E oportunidad pa representa Aruba den e certamen di Miss International 2019, el a tum’e man habri y ta preparando tanto fisicamente como mentalmente, pa representa Aruba dignamente.

LEAVE A REPLY

Please enter your comment!
Please enter your name here