Kiwanis Club of Aruba ta lansa e proyecto di adorno di Pasco. Un idea y iniciativa cu a inicia na aña 2017 pa miembro di Kiwanis Club of Aruba, e tempo ey Lieutenant Governor di Division 26 di e Eastern Canada and The Caribbean District di Kiwanis International den persona di Giantonio Muller. Kiwanis Club of Aruba ta continua cu e proyecto aki durante e luna di november y december.
E meta principal di e proyecto di adorno di Pasco ta, pa recauda fondo pa e Fundacion “Ban Uni Man Pa Cria Nos Muchanan”. E fundacion aki ta percura pa algun aña caba, pa e muchanan di poco recurso, haya algo di come tur mainta na scol y asina aporta na nan prestacion na scol, ya cu desayuno ta keda un alimento di sumo importancia. E adorno di e aña aki tin un diseño moderno unico transparente yena cu confetti zilver den forma di strea. E adorno di Pasco a keda diseña pa Concept Creations y fabrica na Colombia.
E pueblo di Aruba tambe por forma parti di e bunita proyecto aki, door di contribui cu un donacion di AWG 25,00 pa Fundacion “Ban Uni Man Pa Cria Nos Muchanan”, y a cambio ta ricibi un decoracion unico di Pasco. Por tuma contacto cu cualkier miembro di Kiwanis Club of Aruba pa asina haci donacion y ricibi e adorno di Pasco unico aki. Por tuma contacto tambe via di e pagina di Facebook di Kiwanis Club of Aruba of por manda un email na [email protected]
