Na momento di prepara pa e edicion di december, ta duna uno e sentimento di satisfaccion, ya cu otro fin di aña ta yegando y ta yega ora pa analisa kico tur a pasa den e aña. Sinembargo e edicion di december aki ta uno cu mas dedicacion ainda, ya cu ta celebra e di 25 aniversario di FOCUS Reconocimento, cu a bin ta evoluciona den transcurso di su existencia. FOCUS Reconocimento a haci su prome debut den luna di december 1995, unda cu como pionero den revista na Aruba, a cuminsa duna reconocemento na nos hendenan muhe specialmente, cu a destaca den e aña, pa asina empodera, aprecia y balora nos propio hendenan.
Den transcurso di aña a haci varios adaptacion na e criterianan di FOCUS Reconocimento y mester bisa, cu tur aña cu a haci e cambionan, e tabata bon acepta y aprecia pa e lectornan di Revista FOCUS. Mester remarca, cu semper ta un placer pa bay bek den e edicionnan di antes, paso bo ta wak e linea di desaroyo completo. Pa e FOCUS Reconocimento 25 Aniversario a scoge cinco hende muher, cada un ta representa un lustro di e revista. Hende muhernan cu un trayectoria interesante y cu tin un mision y vision den bida pa awendia ta un rol model pa otro hende muhernan. Pa di tercer aña ta duna e publico tambe e oportunidad pa scoge un hende muher, cu a inspira y motiva nan ricibi e Reconocimento FOCUS PANTENE.
Riba e portada di e Edicion Aniversario ta luci nos Miss Aruba, Danna Garcia, cu ta nos embahadora di beyesa na e eleccion di Miss Universe 2019 na Atlanta. Den e contenido ta ilustra diferente acontecimento importante, cu a pasa durante e aña aki tanto na Aruba como internacionalmente. Pa e toke di e celebracion di Fin di Aña, tin un reportahe cu 6 cantante cu ta conoci como e Divanan di Gaita, cu ta un di e simiñanan cu a cuminsa for di jong y awendia nan ta e grandinan na Aruba, pa loke cu a sigui cu e forsa di gaita, cu ta sosten’e y apoy’e. Keda pendiente pa mas di FOCUS Edicion 25 Aniversario Reconocimento!
