Ora el a scucha cu e ta Miss Teen Universe Aruba 2026, Caithlyne Kock, a sinti’e sumamente contento y satisfecho. El a logra e titulo maximo aki despues di tur su trabou duro, sacrificio y determinacion. El a sinti tambe hopi felicidad momento cu el a realisa cu e ta un embahadora di nos isla y di nos hobennan, y di a haya e responsabilidad di por representa su isla internacionalmente. Caithlyne lo carga e sjerp cu ARUBA riba dje na Miss Teen Universe cu su sede ta na Cambodia y ta tuma luga for di 19 pa 26 di october proximo.
E proceso di preparacion cu a hiba Caithlyne na e victoria aki tabata intenso den diferente area. E mester a prepara su mes tanto mentalmente como fisicamente pa por logra e reto aki. E no tabata facil pero cu hopi determinacion y disciplina el a realisa esaki. Y e ta haya cu e proceso tabata uno hopi educativo y cu el a siña hopi di su mes. E lunanan di preparacion duro cu na final a duna un bunita resultado, no solamente pa Caithlyne pero tambe su mama, Chastity Kock-Hodge, cu a compañe y hib’e tur su actividad-, seminario- y trainingnan.
Chastity semper cla pa dun’e e miho consehonan, tips, anim’e y coach cu e tabatin mester. El a yuda Caithlyne cu varios di su preparacionnan hunto cu diferente otro persona. El a wak cu su yiu muhe a evoluciona hopi mes durante henter e trayecto aki. E sentimento como mama riba dia di e certamen tabata uno hopi emocional y nervioso, pero toch hopi sigur y orguyoso cu Caithlyne lo haci tur su best riba e escenario, mirando cu el a traha hopi duro pa logra e soño aki. Y sin duda cu su trayectoria y su experiencia, Chastity tabatin hopi confiansa den su yiu muhe.
Den Focus Digital Magazine di september Chastity ta revela ki ora el a realisa cu su yiu muher, Caithlyne Kock, tabata cla pa ser corona como Miss Teen Universe Aruba 2026. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
Titulonan logra durante e certamen di Miss Teen Universe Aruba 2026:
- MISS TEEN BARBIE CHALLENGE STORY TELLING
- MISS TEEN SPEECH POPULAR
- MISS TEEN SPEECH
- MISS TEEN POPULAR
- MISS TEEN SOCIAL MEDIA
- MISS TEEN DISIPLINA
- MISS TEEN BEST SMILE
- MISS TEEN BIKINI 👙
- MISS TEEN PHOTOGENIC 📸
- MISS TEEN ELEGANCE
- MISS TEEN GALA DRESS 💃
- MISS TEEN UNIVERSE ARUBA 👑❤️
