Actualmente ta na Atlanta tambe e coach di Miss Aruba, Anoutcka Koolman-Burleson, cu tin amplio experiencia den e tarea di guia e candidatanan pa logra lo maximo den certamennan di beyesa internacionalmente. Anoutcka a coach Danna Garcia den su totalidad cu ayudo di profesionalnan na Aruba y tur bou guia y conseho internacional. E ta mas cu agradeci y satisfecho cu e trabou haci pa Danna, un mucha muhe obediente, determina pa logra su meta pero tambe humilde di curason.
IMPRESIONA Y ENCANTA
Ora e ‘national directors’ di otro paisnan grandi den mundo di beyesa, pero tambe e organisacion a bise ayera durante e ‘national director meeting’, cu despues di preliminar nan a keda impresiona y encanta cu Aruba: “Esey caba a haci mi super feliz. Tur cu un smile tabata bisa mi: good luck. E momento ey mi tabata gradici Señor. Mi curpa tabata haya kippevel y esey kiermen Aruba a haci un tremendo trabou, pasobra nan ta wak Aruba como un competencia pa e anochi final. Gana of perde mi a percura pa e nomber di Aruba wordo balora como fuerte competencia den e plataforma aki den mundo di beyesa”.
BATAYA TE NA FINAL
Despues di preliminar Anoutcka mes tambe ta wak Danna fuerte pa por clasifica. Esaki tambe ta e reaccion cu el a ricibi felizmente di tur hende cu ta significa hopi pa e organisacion di Miss Universe. E presidente y director ehecutivo di Miss Universe, Paula Shugart, cu tabata hurado den e entrevista cu e candidatanan, a bisa Anoutcka cu Aruba su entrevista a bay hopi bon y cu el a bin hopi bon prepara pa e certamen. Danna Garcia desde inicio a ser prepara door di Anoutcka pa focus riba su mes y bataya te na final. No compara su mes ‘hamas’ cu ningun otro candidata y ‘nunca copia’ di otronan. Danna a ser prepara pa kere den su mesun potencialnan y esey cerca cada persona ta diferente. Pesey tur preparacion y strategia mester ta tambe diferente. No ta existi un formula!
HUMILDAD TA TRASPASA BEYESA
Lo mas importante den Danna su preparacion cu el a enfatisa riba dje desde inicio te cu awe nochi ta, cu e anochi final ta pa Danna ta agradecido semper na Señor na cada momento di su experiencia pa e caminda cu Señor ta guia nan. Su caminda y resultado ta esun perfecto p’e, pa Anoutcka y pa Aruba. Esaki tambe a haci Danna crece como persona y a la vez como candidata. Anoutcka a bise: “El hombre propone y Dios dispone”. Tur hende den e sala durante e preliminar a wak loke e preparacion a forma den Danna: 1) Un dama sigur di su mes enfrentando tur reto cu e por encontra su mes cu ne cu positivismo, humildad, confiansa, personalidad y semper Dios su dilanti. Anoutcka na tur momento a purba lag’e compronde cu Humildad ta traspasa Beyesa. 2) Un persona agradecido pa e oportunidad di por ta riba e escenario ey y cumpli cu un soño di dje y cualkier mucha muhe. El a briya cu su seguridad, personalidad, actitud y elegancia. Su lucha incansablemente pa clasifica y purba na trece e corona Aruba sigur sigur e trabou ey a ser haci.
