Den edicion di december tin un variacion di highlights di nos hendenan cu ta comparti algun detaye interesante di nan bida. Entre e personanan aki tin e parehanan super feliz, cu ta spera yegada di nan baby den 2020, esta Stephanie Dirksz-Werleman y Lyonel Dirksz, Odo y Joseph Frangie, Rubiella Toppenberg y Kevin Labadie, Ghislaine Lopez Geerman y Remy Lopez, Darlene Engelbrecht Falconi y Rick Engelbrecht
Stephanie Dirksz-Werleman ta spera nan baby mucha muhe den 2020. Dos emocion den un solo aña, ya cu den pleno preparacion di matrimonio, ta haya sa e noticia cu e ta na estado. Preparacion pa e yegada di baby ta bayendo bon, recientemente nan a cuminsa prepara e baby su camber, cu lo tin e tema: bou di lama.
Odo y Joseph Frangie y ta sperando nan di 3 yiu y ta trata di un mucha homber. E embaraso aki tabata un sorpresa pa nan, paso durante vakantie, Odo a kere cu su malestar tabata tin di haber cu e cambio di clima di e pais. E baby sigur lo trece felicidad den nan cas y e bida nobo. Nan ta sperando su yegada cu hopi ansiedad y entusiasmo.
Rubiella Toppenberg y Kevin Labadie ta sperando nan prome yiu, cu ta mucha homber, na comienso di maart 2020. E nomber cu nan a scoge p’e baby tin un nificacion special pa nan, ya cu su nomber tin como nificacion: “One & Unity”. E camber di baby ta den proceso y nan a cab’i yega bek di un exitoso vakantie di ‘babyshopping.
Ghislaine Lopez Geerman y Remy Lopez ta sperando nan di dos yiu. Nan prome yiu ta un mucha muhe di 1 aña y 6 luna y tin e bunita nomber di Kaylee. E preparacionnan pa yegada di nan di dos baby ta den ful swing. Nan ta sintie manera un experiencia nobo, pa ta mama y tata di un mucha homber.
Darlene Engelbrecht Falconi y Rick Engelbrecht ta den dushi espera di nan prome yiu na comienso di januari 2020. Nan a scoge pa no haya sa e sexo di nan baby y a opta pa warda te dia e nace y asina disfruta di e momento di sorpresa. Definitivamente tanto Darlene como Rick ta wardando ansiosamente riba nan prins of prinses.
