Ayera e noticia cu e ex-hungador di Lakers, Kobe Bryant (41), a fayece hunto cu su yiu muher, Gianna Maria Onore (13), den un accidente di helicopter, a shock miyones di hende rond mundo. Di tur e cantidad di post riba social media unda su fans a reacciona cu tristesa riba e noticia aki. E tabata conoci pa biaha den su helicopter Sikorsky S-76B y tabata bayendo un evento di basketball pa hobennan na Mamba Sports Academy na Thousand Oaks, California. Kobe Bryant a uza un helicopter priva pa biaha durante hopi aña, desde cu e tabata hunga pa Los Angeles Lakers.
Pa Pau Gasol, cu tabata compañero di Kobe Bryant den Lakers entre 2008 y 2014, a bisa cu Kobe no ta solamente un figura legendario pero mucho mas. E tabata su mentor, su ruman grandi, su guia pa triunfa den NBA. Ambos a logra hunto dos renchi consecutivamente na 2009 y 2010, y nan tabata un di duonan mas carismatico riba cancha entre 2008 y 2014. “Na februari 2008 mi bida a cambia”, Pau Gasol a skirbi den e prologo di e buki ‘Mamba Mentality’ di Kobe Bryant. E streya di NBA a haci un repaso di su carera extraordinario di mas cu 20 temporada cu Los Angeles Lakers.
E dos pasionnan grandi di Kobe Bryant tabata deporte y ‘storytelling’ di fantasia. Su inspiracion pa publicacion di The Wizenard Series tabata door cu el a sinti cu e kier a crea storianan pa e muchanan por siña mientras nan ta entretene nan mes. Su obhetivo tabata pa debolbe alegria den e deportenan hubenil mientras e ta siña lesnan importante di bida. Su prome buki di Wizenard Series: Training Camp, ta un storia atrabes di e perspectivanan di cinco hungador hoben di basketball, cada uno enfrentando su propio conhunto di obstaculonan tanto riba como pafo di cancha. E siguiente buki di Wizenard Series: Season One, ta conta e storia di un di seis hungador di e ekipo yama Reggie, cu no solamente ta continua e naracion di The West Bottom Badgers, sino tambe ta agrega un perspectiva nobo.
E legendario Kobe Bryant su bida y bukinan ta sigui ta un inspiracion pa hopi hoben. Vanessa Bryant y yiunan Natalia, Bianka y Capri a perde dos ser stima na mesun momento y ta un dolor inmenso pa e famia aki, cu mester supera e tristesa aki pa sigui dilanti cu nan bida. Un investigacion di e accidente ta andando y e autoridadnan ta bisa cu por tuma algun dia pa por recupera e curpanan. Entre e victimanan tin tambe John Altobelli, un coach campeon di baseball, su casa Keri y yiu Alyssa. E otro victimanan ta: Christina Mauser, Sarah Chester, Payton Chester y Ara Zobayan.
