Jennifer López y Shakira a protagonisa den Hard Rock Stadium na Miami, loke ya hopi a califica como e miho espectaculo Halftime di Super Bowl di e ultimo añanan. Pa prome biaha den historia, dos artista latino di nan caliber ta subi hunto riba escenario na final di ‘American football’ y nan a laga tur hende babuca, cu nan movimentonan di baile iconico pa un presentacion unico den su estilo. Un show repleto di exitonan, baile, acrobacia y emocion. Sin ningun duda, un Halftime cu a converti den un homenahe na e cultura latino, cu aparicion sorpresa di Bad Bunny y J. Balvin.
Como un sorpresa, Jennifer López a presenta hunto cu su yiu Emme Maribel, di 11 aña riba escenario. Esaki a resulta di un di e momentonan mas emocionante di e anochi, unda e yiu muher di e diva di Bronx y Marc Anthony a debuta den un forma impactante riba escenario. Cu un bandera di Puerto Rico bon na halto, el a canta Lets Get Loud y un grupo grandi di mucha a presenta hunto cu ne. Emme a demostra cu e ta un streya cu a hereda e talento di su mayornan. E espectaculo di e dos divanan den Halftime di Super Bowl 2020 lo no wordo lubida facilmente. Despues di lunanan di training, alimentacion estricto y un sin fin di rutina di ehercicio y nervio, J.Lo (50) y Shakira (43) a ofrece un show sin precedente. No ta solamente e baile- y cancionnan tabata e centro di atencion pa e audiencia, pero tambe e vestuario cu nan a luci den nan presentacion. Ambos ta costumbra pa deslumbra riba stage den nan giranan cu nan vestuario, y e biaha aki nan a cera e espectaculo hunto yen di briyo y luz den nan outfit plata y oro.
