Veronica Pichardo a cuminsa su carera artistico tempo e tabatin 16 aña tocando piano na su cas na Corsou. E tabata toca melodianan cu e tabata pensa y asina a sigui crece y evoluciona su talento. Desde su 6 aña e tabata canta cu su tata, Andrey Pichardo, cu ta un di su inspiracionnan di mas grandi. Su tata tambe ta un musico profesional y el a siñe tur loke e sa awendia di musica. E tabata toca duro na cas for di prome cu Veronica por a cana y asina for di chikito el a sinti e conexion cu musica.
Cu 16 aña Veronica a dicidi cu di berdad musica ta loke e ta bay haci cu su bida, y el a cambia su ‘mindset’ di un mucha hopi insigur pa un hoben sumamente social, contento y sigur. El a haci e desicion pa bay completamente pa su soño y kier ta un inspiracion pa esunnan cu ta pensa cu nan no por haci loke nan curason ta bisa nan. Den hopi tiki tempo na Corsou e nomber “VERONICA” a bira un nomber cu nificacion den musica. El a traha cu diferente artista cu nunca lo e por a pensa cu lo a gusta su musica. Despues di hopi tempo cu el a lucha cu desafionan di siguridad den su mes y habilidadnan, e ta sinti porfin cu e lo logra su soño y ya caba el a logra mas cu nunca e por a pensa.
Biniendo den 2020 e tin diferente proyecto pendiente, incluyendo un cantica cu e tin cu Ir-Sais, su videoclip graba na Aruba cu Lino Ogenio y Michael Fowler, un videoclip graba na New York y e ta hopi emociona pa anuncia cu e aña aki su album ta sali. Veronica sigur ta sigui conta cu e apoyo di tur hende cu ta dune sosten no solamente na Aruba, Corsou y Boneiru, pero tambe internacionalmente
