Yrausquin, dealer di auto y compania di famia pa mas cu 67 aña na Aruba, recientemente a ricibi den nan showroom e 45 muchanan di 4 te cu 12 aña di edad, nomina como finalista di e competencia di pintamento “Yrausquin Carnaval Super Car” 2nd edition. Aruba su Carnaval 66 combina cu e fantasia di e muchanan tabata parti di e inspiracion p’e muchanan crea nan mesun super car.
Den e panel di hurado profesional y diversifica tabatin e siguiente personanan: Chibi van der Hans, Freddy Wijenberg, Jarissa Dubero, Romelinda Maldonado, Roxana Rodriguez y incluyendo dos teenager, Rasheed Lowe y Edouard Yrausquin (yiu di Christina Yrausquin). Nan tabatin un tarea grandi y difícil pa por selecta e finalistanan for di 825 pintura. E huradonan a keda hopi impresiona cu e fantasia y creacion di cada pintura.
Pa selecciona e 45 finalistanan, a basa e puntonan riba creatividad, originalidad y uso di material, mientras cu originalidad a conta dobel. Tambe a tuma den consideracion e edad di cada mucha. Separa di e criterianan aki tabatin cierto reglanan pa cumpli cu nan. E ganadornan di categora di 4 y 5 aña di edad ta Connor, Ciara, Justin, Valentina y Jaycey. E ganadornan di categorida di 6 te cu 8 aña di edad ta Mila, Celina, Adonis, Aydrian y Kailen. E ganadornan di 9 te cu 12 aña di edad ta Raiden, Jayrienne, Cyrielle, Mia Bella y Irene.
Christina Yrausquin, gerente di benta, ta gradici Office Systems Aruba pa nan gran gesto di sponsor 2,000 mil florin pa e scol ganador Cayena Kleuterschool. E premio aki ta pa busca material di scol pa e vak di CKV. Yrausquin, dealer oficial di e marcanan renombra Ford, Lincoln, Mitsubishi y Mercedes-Benz, cu su mesun inhouse Body Shop, Quick Lane ®, departamento di piesa y servicio, ta felicita tur e finalistanan y en particular e 15 ganadornan, y tambe gradici tur mucha cu a participa y a haci nan best pa crea nan “Carnival Super Car”. Ademas gerente di Yrausquin kier gradici tur hurado pa nan tempo, profesionalismo y dedicacion pa selecta e ganadornan. Na 2021 un edicion nobo di e competencia di pintamento lo tuma lugar. Por tuma contacto libremente cu e huradonan pa cualkier pregunta.
